മലപ്പുറം:വഖഫ് ബോര്‍ഡില്‍ അമുസ്ലീം അംഗങ്ങളെ നിയമിക്കുന്നതുമായി ബന്ധപ്പെട്ട് ‘വഖഫ് നിയമവും യു ഡി എഫ് കീഴടങ്ങലും’ എന്ന വിഷയത്തില്‍ സി പി എം മലപ്പുറത്ത് സംഘടിപ്പിച്ച സെമിനാറില്‍ സമസ്ത സെക്രട്ടറി ഉമര്‍ ഫൈസി മുക്കം പങ്കെടുത്തു.വഖഫ് വിഷയത്തില്‍ ബി ജെ പി നേതാവ് ഷോണ്‍ ജോര്‍ജിന്റെ അപ്പീലിനെ സര്‍ക്കാര്‍ അഭിഭാഷകന്‍ പിന്തുണച്ച സംഭവം പരാമര്‍ശിച്ച ഉമര്‍ ഫൈസി മുക്കം സര്‍ക്കാരിനെ വിമര്‍ശിച്ചു. മുസ്ലീംലീഗ് മന്ത്രിയുള്ള വകുപ്പിലാണ് ഈ സ്ഥിതിയെന്നും അദ്ദേഹം പറഞ്ഞു.
ഹംസയും ഉമര്‍ ഫൈസിയും ചേര്‍ന്നുള്ള വഖഫ് ബോര്‍ഡാണ് സര്‍ക്കാരിന്റെ പ്രശ്‌നം.അതിനാല്‍ തന്നെ ഇക്കാര്യത്തില്‍ ആര്‍ എസ് എസിനോട് കൂട്ടുകൂടാന്‍ യു ഡി എഫിന് ഒരു മടിയുമില്ലെന്നും ഉമര്‍ ഫൈസി കുറ്റപ്പെടുത്തി. മതമൂല്യങ്ങള്‍ നഷ്ടപ്പെട്ടാലും രണ്ട് അമുസ്ലിങ്ങളെ ബോര്‍ഡില്‍ ചേര്‍ക്കാനാണ് ശ്രമം നടന്നതെന്ന് അദ്ദേഹം പറഞ്ഞു.ഓപ്പറേഷന്‍ തൂഫാന്‍ നടപ്പാക്കുമ്പോള്‍ മദ്യം സുലഭമാകുന്നുണ്ടെന്നും അതില്‍ ആളുകള്‍ തൂഫാനാകുകയാണെന്നും ഉമര്‍ ഫൈസി മുക്കം പരിഹസിച്ചു.
സെമിനാര്‍ ഉദ്ഘാടനം ചെയ്ത പ്രതിപക്ഷ നേതാവ് പിണറായി വിജയന്‍ വന്ദേമാതരം ആലാപന വിഷയമുള്‍പ്പെടെ ചൂണ്ടിക്കാട്ടി സര്‍ക്കാരിനെ രൂക്ഷമായി വിമര്‍ശിച്ചു.പുതിയ സര്‍ക്കാര്‍ അധികാരമേറ്റത് തന്നെ വന്ദേമാതരം പൂര്‍ണമായി ആലപിച്ചുകൊണ്ടാണ്.അതില്‍ തന്നെ സര്‍ക്കാരിന്റെ ആര്‍ എസ് എസ് അജണ്ടകള്‍ക്കുള്ള കീഴടങ്ങല്‍ വ്യക്തമായെന്നും അദ്ദേഹം ആരോപിച്ചു. വന്ദേമാതരം വിഷയത്തില്‍ കോണ്‍ഗ്രസിന് വ്യക്തമായ നിലപാടില്ല. ഭരിക്കുന്ന പല സംസ്ഥാനങ്ങളിലും പാര്‍ട്ടി ആസ്ഥാനത്തും പൂര്‍ണമായി പാടി അവര്‍ ആര്‍ എസ് എസ് നയങ്ങള്‍ക്കൊപ്പമാണെന്ന് തെളിയിക്കുകയാണ്. രാജ്യത്ത് ഒരു മുസ്ലിം സ്ഥാപനത്തില്‍ അമുസ്ലിങ്ങള്‍ വേണമെന്ന തോന്നല്‍ വരുന്നത് വര്‍ഗീയ ചിന്തയാണെന്നും പിണറായി കുറ്റപ്പെടുത്തി.
