കൊച്ചി : കൊച്ചി മെട്രോയുടെ പേര് മാറ്റുന്നത് പരിഗണനയിലില്ലെന്ന് മുഖ്യമന്ത്രി വ്യക്തമാക്കിയതോടെ, പ്രൊപ്പോസല് മാത്രമാണ് നല്കിയതെന്നും പേര് മാറ്റം സംബന്ധിച്ച് തീരുമാനമെടുക്കേണ്ടത് സര്ക്കാരാണെന്നുമുളള വിശദീകരണവുമായി കെഎംആര്എല് എംഡി ലോക്നാഥ് ബെഹ്റ രംഗത്തുവന്നു. സര്ക്കാര് അറിയാതെയാണ് കെഎംആര്എല് പേര് മാറ്റുന്നത് പ്രഖ്യാപിച്ചതെന്ന് മുഖ്യമന്ത്രി പറഞ്ഞതോടെ ബഹ്റ വെട്ടിലായിരുന്നു.
കൊച്ചി മെട്രോ റെയില് ലിമിറ്റഡ് എന്ന പേര് മാറ്റി കേരളം മെട്രോ റെയില് ലിമിറ്റഡ് എന്നാക്കണമെന്നാവശ്യപ്പെട്ട് ശുപാര്ശ നല്കിയെന്നാണ് ബഹ്റ നേരത്തെ അറിയിച്ചത്.
സര്ക്കാര് അറിയാതെയാണ് കെഎംആര്എല് പേര് മാറ്റുന്നത് പ്രഖ്യാപിച്ചതെന്നും ഇത് സംബന്ധിച്ച വാര്ത്ത രാവിലെ പത്രത്തിലൂടെയാണ് അറിഞ്ഞതെന്നും മുഖ്യമന്ത്രി പറഞ്ഞു.പേര് മാറ്റം സര്ക്കാരിന്റെ ആലോചനയില് പോലുമില്ല. സര്ക്കാരിനോട് ആലോചിക്കാതെയാണ് കെഎംആര്എല് പത്രവാര്ത്ത നല്കിയതെന്നും മുഖ്യമന്ത്രി പറഞ്ഞു.
