കൊച്ചി:കൊച്ചി മെട്രോ റെയില് ലിമിറ്റഡിന്റെ പേര് ‘കേരളം മെട്രോ’ റെയില് ലിമിറ്റഡ് എന്ന് പുനര്നാമകരണം ചെയ്യണമെന്ന കെഎംആര്എല് എംഡിയുടെ ശുപാര്ശയോട് വിയോജിച്ച് എറണാകുളം എംപി ഹൈബി ഈഡന്. ലോക്നാഥ് ബെഹ്റയുടെ ശുപാര്ശ തളളണമെന്ന് ആവശ്യപ്പെട്ട് ഹൈബി ഈഡന് മുഖ്യമന്ത്രിക്ക് കത്തയച്ചു.പേരുമാറ്റുകയെന്നത് വിചിത്രമായ കാര്യമാണെന്നും അഭിപ്രായ ഐക്യമില്ലാതെ തിടുക്കത്തില് തീരുമാനമെടുക്കരുതെന്നും ഹൈബി കത്തില് ചൂണ്ടിക്കാട്ടി.
മറ്റു പദ്ധതികള്ക്ക് കൊച്ചി മെട്രോയുടെ വൈദഗ്ധ്യം ഉപയോഗപ്പെടുത്താം.മറ്റു മെട്രോ പദ്ധതികള്ക്ക് എന്തു പേരിടണം എന്നത് പദ്ധതി പൂര്ത്തിയാകുന്ന വേളയില് ആലോചിക്കേണ്ട കാര്യമാണ്. കൊച്ചി മെട്രോയുടെ പേരുമാറ്റുന്ന കാര്യത്തില് എടുത്തുചാടി തീരുമാനം എടുക്കരുതെന്നും ഹൈബി ഈഡന് ആവശ്യപ്പെട്ടു.
കൊച്ചി മെട്രോയുടെ പേര് കേരളം മെട്രോ റെയില് ലിമിറ്റഡ് എന്ന് പുനര്നാമകരണം ചെയ്യണമെന്ന ാണ് കെഎംആര്എല് എംഡി ലോക്നാഥ് ബെഹറ സര്ക്കാരിനോട് ആവശ്യപ്പെട്ടത്.സംസ്ഥാനമെമ്പാടുമുളള നഗര ഗതാഗത പദ്ധതികള് ആസൂത്രണം ചെയ്യാനും നടപ്പിലാക്കാനും ലക്ഷ്യമിട്ടാണ് ഈ പേര് മാറ്റം. നാഗ്പുര് മെട്രോ ‘മഹാരാഷ്ട്ര മെട്രോ’ ആയും ലഖ്നൗ മെട്രോ ‘ഉത്തര്പ്രദേശ് മെട്രോ’ ആയും അഹമ്മദാബാദ് മെട്രോ ‘ഗുജറാത്ത് മെട്രോ’ ആയും പുനഃസംഘടിപ്പിച്ച മാതൃകയിലാണ് ലോക്നാഥ് ബെഹറയുടെ ശുപാര്ശ.
