തൃശൂര്: രാഷ്ട്രീയത്തിന്റെ പേരില് അദ്ധ്യാപകര്ക്കും വൈസ് ചാന്സലര്മാര്ക്കുമെതിരെ നടക്കുന്ന സമരാഭാസങ്ങള് അപലപനീയമാണെന്ന് തപസ്യ കലാസാഹിത്യവേദി കേന്ദ്ര ഭരണസമിതി യോഗം അഭിപ്രായപ്പെട്ടു. കാലടി സംസ്കൃത സര്വകലാശാല വിസി ഡോ. സിസാ തോമസിനെതിരെ നടന്നത് നിന്ദ്യമായ ആക്രമണമാണ്. വിസിയുടെ മതം തെരഞ്ഞ് പ്രതീകാത്മക ശവസംസ്കാരം നടത്തിയെന്ന വാര്ത്ത പ്രബുദ്ധ കേരളത്തിന്റെ പാരമ്പര്യത്തെ അപമാനിക്കുന്നതാണെന്ന് യോഗം ചൂണ്ടിക്കാട്ടി.
ഓണാഘോഷത്തിന്റെ മറവിലാണ് കേരള സര്വകലാശാല വിസിയെ പ്രതീകാത്മകമായി ചവിട്ടിത്താഴ്ത്തുന്ന വൈകൃതം അരങ്ങേറിയത്. അദ്ധ്യാപകര്ക്ക് കുഴിമാടം ഒരുക്കിയും അവരുടെ കസേര കത്തിച്ചുമൊക്കെ നടത്തുന്ന അക്രമങ്ങളെ കലയുടെ പേര് പറഞ്ഞ് ന്യായീകരിക്കുന്ന വിചിത്രമായ സാഹചര്യമാണ് കേരളത്തിലുള്ളതെന്ന് തപസ്യ ചൂണ്ടിക്കാട്ടി. കലയുടെയും സാഹിത്യത്തിന്റെയും വസന്തം തീര്ത്തിരുന്ന കലാലയങ്ങളില് നിന്ന് ഇന്ന് പുറത്തു വരുന്ന ഇത്തരം വര്ത്തമാനങ്ങള് സാംസ്കാരിക കേരളത്തെ ഞെട്ടിക്കാത്തത് അതിശയകരമാണ്.
സമരങ്ങള്ക്ക് സര്ഗാത്മകവും ഭാവാത്മകവുമായ രീതിശാസ്ത്രം കണ്ടെത്തുന്നിടത്താണ് വിദ്യാര്ത്ഥിരാഷ്ടീയം സാര്ത്ഥകമാവുന്നത്. ചോരയുടെ ഗന്ധം വമിക്കുന്ന പ്രത്യയശാസ്ത്രത്തില് മുളച്ച വിദ്യാര്ത്ഥി പ്രസ്ഥാനങ്ങള്ക്ക് അത് അസാധ്യമാണെന്ന് അവര് അനുദിനം തെളിയിച്ചുകൊണ്ടിരിക്കയാണ്. വിദ്യ അര്ത്ഥിക്കുകയല്ല, ആര്ത്തി വിദ്യയാക്കുകയാണ് അവര്. സാംസ്കാരികമായി കേരളം ഉയരണമെങ്കില് സര്ഗാത്മക യുവത്വത്തെ വീണ്ടെടുത്തേ മതിയാകൂ. സങ്കുചിത കക്ഷി രാഷ്ട്രീയത്തിന്റെ പിടിയില് നിന്ന് മോചിതരായി യുവസമൂഹം നാടിന്റെ വിശാലമായ താത്പര്യങ്ങള് സംരക്ഷിക്കാന് മുന്നിട്ടിറങ്ങണമെന്ന് തപസ്യ അഭ്യര്ത്ഥിച്ചു. തൃശൂരില് ചേര്ന്ന യോഗത്തില് സംസ്ഥാന അദ്ധ്യക്ഷന് പി. വിജയകൃഷ്ണന്, വര്ക്കിങ്ങ് പ്രസിഡന്റ് പ്രൊഫ. പി.ജി. ഹരിദാസ്, ജനറല് സെക്രട്ടറി എം. സതീശന് തുടങ്ങിയവര് സംസാരിച്ചു.
