തിരുവനന്തപുരം: വഴിയാത്രക്കാരൻ റോഡിൽ കുഴഞ്ഞുവീണത് ശ്രദ്ധയിൽപ്പെട്ടതിനെ തുടർന്ന് വാഹനം നിർത്തി സഹായവുമായി ഗവർണർ രാജേന്ദ്ര വിശ്വനാഥ് ആർലേക്കർ. ഏകദേശം 15 മിനിറ്റോളം റോഡിൽ ചെലവഴിച്ച ഗവർണർ അടിയന്തര ശുശ്രൂഷ ഉറപ്പാക്കുകയും ആശുപത്രിയിലെത്തിച്ച് ചികിത്സ ലഭ്യമാക്കാൻ നിർദേശം നൽകുകയും ചെയ്തു.
വെള്ളയമ്പലം ആൽത്തറ ദേവീക്ഷേത്രത്തിന് സമീപം താമസിക്കുന്ന ഗിരീഷാണ് റോഡിലേക്ക് തലകറങ്ങി വീണത്. ഈ സമയം ഓണാഘോഷ പരിപാടിയിൽ പങ്കെടുക്കാനായി രാജ്ഭവൻ ഗേറ്റിന് പുറത്തേക്ക് പോകുകയായിരുന്ന ഗവർണറുടെ ശ്രദ്ധയിൽ ഇക്കാര്യം പെട്ടത്. സംഭവം കണ്ടയുടൻ വാഹനം നിർത്തി പുറത്തിറങ്ങിയ ഗവർണർ ഗിരീഷിന്റെ അരികിലെത്തി പ്രാഥമിക പരിശോധനകൾ നടത്തി.
ഗിരീഷിന് അടിയന്തര ശുശ്രൂഷ ഉറപ്പാക്കാൻ ഒപ്പമുണ്ടായിരുന്ന ഉദ്യോഗസ്ഥർക്ക് നിർദ്ദേശം നൽകി. രാജ്ഭവൻ സ്റ്റാഫ് ഉടൻ തന്നെ വെള്ളമെത്തിച്ച് മുഖം കഴുകിക്കുകയും പ്രാഥമിക ശുശ്രൂഷ നൽകുകയും ചെയ്തു. സ്ഥിതി വഷളാകാതിരിക്കാൻ ഗിരീഷിനെ ഉടൻ തന്നെ ആശുപത്രിയിലെത്തിച്ച് ചികിത്സ ലഭ്യമാക്കാൻ ഗവർണർ നിർദ്ദേശം നൽകുകയും അതിനായുള്ള ക്രമീകരണങ്ങൾ പൂർത്തിയാക്കുകയും ചെയ്തു.
