തിരുവനന്തപുരം: കേരളത്തിലെ തീരപ്രദേശങ്ങളില് ശക്തമായ തിരമാലയ്ക്കും കള്ളക്കടല് പ്രതിഭാസത്തിനും സാധ്യത.ഈ സാഹചര്യത്തില് ദേശീയ സമുദ്രസ്ഥിതിപഠന ഗവേഷണ കേന്ദ്രം ചുവപ്പ് ജാഗ്രത പ്രഖ്യാപിച്ചു.മുന്നറിയിപ്പിന്റെ ഭാഗമായി കേരളത്തിലെ തീരപ്രദേശങ്ങളില് കവചം (KaWaCHaM) മുന്നറിയിപ്പ് സംവിധാനത്തിന്റെ ഭാഗമായുള്ള സൈറണുകള് മുഴങ്ങി.
കേരള തീരത്ത് ചൊവ്വാഴ്ച അര്ധരാത്രി മുതല് 20/08/2026 വൈകുന്നേരം 05.30 വരെ 1.1 മുതല് 1.8 മീറ്റര് വരെ ഉയര്ന്ന തിരമാലയ്ക്കും കള്ളക്കടല് പ്രതിഭാസത്തിനും സാധ്യതയുണ്ടെന്നാണ് ദേശീയ സമുദ്രസ്ഥിതിപഠന ഗവേഷണ കേന്ദ്രം (INCOIS) മുന്നറിയിപ്പ് നല്കിയിട്ടുളളത്. തീരദേശ മേഖലകളില്, പ്രത്യേകിച്ച് താഴ്ന്ന പ്രദേശങ്ങളില്, വെള്ളം കയറാനും കടലാക്രമണത്തിനും സാധ്യത.
തിരുവനന്തപുരം കാപ്പില് മുതല് പൊഴിയൂര് വരെ, കൊല്ലം- ആലപ്പാട് മുതല് ഇടവ വരെ, ആലപ്പുഴ- ചെല്ലാനം മുതല് അഴീക്കല് ജെട്ടി വരെ,എറണാകുളം മുനമ്പം FH മുതല് മറുവക്കാട് വരെ, തൃശൂര് ആറ്റുപുറം മുതല് കൊടുങ്ങല്ലൂര് വരെ, മലപ്പുറം കടലുണ്ടി നഗരം മുതല് പാലപ്പെട്ടി വരെ, കോഴിക്കോട് ചോമ്പാല FH മുതല് രാമനാട്ടുകര വരെ, കണ്ണൂര് വളപട്ടണം മുതല് ന്യൂ മാഹി വരെ, കാസര്ഗോഡ് കുഞ്ചത്തൂര് മുതല് കോട്ടക്കുന്ന് വരെ പ്രത്യേക ജാഗ്രത വേണം.
തമിഴ്നാട്ടിലെ കന്യാകുമാരി, രാമനാഥപുരം, തൂത്തുക്കുടി, തിരുനെല്വേലി തീരങ്ങളിലും, ലക്ഷദ്വീപ്, മാഹി, കര്ണാടക തീരങ്ങളിലും ഉയര്ന്ന തിരമാലയ്ക്കും കള്ളക്കടല് പ്രതിഭാസത്തിനും ജാഗ്രത മുന്നറിയിപ്പ് നല്കിയിട്ടുണ്ട്.
