തിരുവനന്തപുരം: ബിജെപി നേതാക്കള്ക്ക് പ്രത്യയശാസ്ത്ര അവബോധം വര്ദ്ധിപ്പിക്കുന്നതിനും സംഘടനാപ്രവര്ത്തനത്തിന്റെ പരിശീലനത്തിനുമായി മാരാര്ജി ഭവനില് സംഘടിപ്പിച്ച സംസ്ഥാനതല പണ്ഡിറ്റ് ദീന്ദയാല് ഉപാധ്യായ പ്രശിക്ഷണ് മഹാഭിയാന് സംസ്ഥാന അധ്യക്ഷ്യന് രാജീവ് ചന്ദ്രശേഖര് എംഎല്എ ഉദ്ഘാടനം ചെയ്തു. ജില്ലാതല പരിശീലനത്തില് വിഷയങ്ങള് അവതരിപ്പിക്കേണ്ടവരുടെ പരിശീലനമാണ് സംഘടിപ്പിച്ചത്.
ദേശീയ സഹസംഘടനാ സെക്രട്ടറി വി. സതീഷ്, വി. മുരളീധരന് എംഎല്എ, ദല്ഹി വക്താവ് രാജ്കുമാര് ഫുല്വാരിയ, സംസ്ഥാന ജനറല് സെക്രട്ടറി എം.ടി. രമേശ്, തെലങ്കാന സംസ്ഥാന ഉപാധ്യക്ഷന് കാസം വെങ്കടേശ്വരലു, ദേശീയ സെക്രട്ടറി അരവിന്ദ് മേനോന്, ശ്യാമപ്രസാദ് മുഖര്ജി റിസര്ച്ച് ഫൗണ്ടേഷന് ഡയറക്ടര് വിജയ് സിങ്, പാര്ലമെന്റ് ഓഫീസ് സെക്രട്ടറി ശിവശക്തി ബക്ഷി, യുവമോര്ച്ച ദേശീയ ഉപാധ്യക്ഷന് അഭിനവ് പ്രകാശ് തുടങ്ങിയവര് വിവിധ സെഷനുകള്ക്ക് നേതൃത്വം നല്കി. സമാപനസമ്മേളനത്തിന്റെ ഉദ്ഘാടനം വി. മുരളീധരന് എംഎല്എ നിര്വഹിച്ചു.
പരിശീലന മഹാഭിയാന്റെ തുടര്ച്ചയായി സംസ്ഥാനത്തെ 30 സംഘടനാ ജില്ലകളിലുമായി സപ്തംബര് മാസത്തില് മൂന്ന് ദിവസത്തെ പരിശീലനം നടക്കും. പണ്ഡിറ്റ് ദീന്ദയാല് ഉപാധ്യായയുടെ ഏകാത്മ മാനവദര്ശനവും രാഷ്ട്രസേവനത്തിന്റെ ആശയങ്ങളും സംഘടനാ പ്രവര്ത്തനത്തിന്റെ പാഠങ്ങളും ഉള്ക്കൊണ്ട് പ്രവര്ത്തകരെ കൂടുതല് കരുത്തരാക്കാനും ഉദ്ദേശിച്ചാണ് പരിശീലനം സംഘടിപ്പിക്കുന്നത്.
ആശയത്തില് വ്യക്തത, പ്രവര്ത്തനത്തില് മികവ്, രാഷ്ട്രസേവനത്തില് സമര്പ്പണം. കൂടുതല് കരുത്തുറ്റ പ്രവര്ത്തകരിലൂടെ കൂടുതല് ശക്തമായ സംഘടനയെ വാര്ത്തെടുത്ത് വികസിത ഭാരതം എന്ന മഹാലക്ഷ്യത്തിലേക്ക് മുന്നേറുക എന്നതാണ് പ്രശിക്ഷണ് മഹാഭിയാന് 2026 ന്റെ ലക്ഷ്യം.
