ബെംഗളൂരു: ടോക്സിക് എന്ന സിനിമയുടെ മാജികിന് സാക്ഷിയാവാന് കാത്തിരിക്കുക എന്ന സന്ദേശം നല്കി ഗീതു മോഹന്ദാസിന്റെ ടോക്സിക് സിനിമയില് അഭിനയിക്കുന്ന ആറ് സുന്ദരികള്. കിയാര, ഹുമ ഖുറേഷി, രുക്മിണി വസന്തന്, നയന്താര, താര എന്നിവരാണ് ഈ ആറ് സുന്ദരികള്.
നായകന് യാഷും ഈ ആറ് നടിമാരും ഒന്നിച്ച ബെംഗളൂരുവില് നടന്ന ടോക്സികിന്റെ ട്രെയിലര് ലോഞ്ച് ചടങ്ങ് ഇതിനകം വലിയ ചര്ച്ചയായിക്കഴിഞ്ഞു. അവിശ്വസനീയമായ ഒരു അനുഭവത്തിന് കാത്തിരിക്കൂ, ഈ സംവിധായിക നിങ്ങളെ ഞെട്ടിക്കും എന്നാണ് നയന്താര ഈ ചടങ്ങില് പറഞ്ഞത്. നിരവധി താരങ്ങള് ഉള്ള ഒരു സിനിമയില് അഭിനയിക്കാന് താല്പര്യമില്ലെന്ന് പറഞ്ഞ നയന്താര പക്ഷെ ടോക്സികിന്റെ കഥ കേട്ടതോടെ അഭിനയിക്കാമെന്ന് സമ്മതിക്കുകയായിരുന്നു എന്നാണ് നയന്താര അഭിപ്രായപ്പെട്ടത്. ട്രെയിലര് കണ്ട് താന് തരിച്ചിരുന്നുപോയെന്നും ഈ സിനിമയുടെ പിന്നണിയില് പ്രവര്ത്തിക്കുന്നവര് അത്രയും വലിയ ഒരു ലോകമാണ് സൃഷ്ടിച്ചിരിക്കുന്നതെന്നും ഹുമ ഖുറേഷി പറഞ്ഞു.
വളരെ വെല്ലുവിളി നിറഞ്ഞ ഒന്നായിരുന്നു ഷൂട്ടിംഗ് എന്നും സംവിധായിക കൂടുതല് മെച്ചപ്പെട്ട പ്രകടനം ആവശ്യപ്പെട്ടുകൊണ്ടിരുന്നുവെന്നും അതിനാല് താന് ടോക്സികിന്റെ സെറ്റില് അനുദിനം ഒരു നടിയെന്ന നിലയില് വളരുകയായിരുന്നു രുക്മിണി വസന്തന് അഭിപ്രായപ്പെട്ടു.
ഇനി തന്റെ കരിയര് ടോക്സികിന് മുന്പുള്ള കിയാര എന്നും ടോക്സിന് ശേഷമുള്ള കിയാര എന്നുമായി വേര്തിരിക്കപ്പെടുമെന്ന് തനിക്കുറപ്പുണ്ടെന്നാണ് കിയാര സൂചിപ്പിച്ചത്. സിനിമയിലെ നായകനായ യാഷും ഈ സിനിമ ഒരു സൂപ്പര് ഡൂപ്പര് ഹിറ്റ് ആകുമെന്ന പ്രതീക്ഷയാണ് പ്രകടിപ്പിച്ചത്.
ആഗസ്റ്റ് 26 നാണ് ചിത്രത്തിന്റെ ആഗോള റിലീസ്. ചിത്രത്തിന്റെ ട്രെയിലറിന് മികച്ച പ്രതികരണമാണ് ലഭിക്കുന്നത്. ആക്ഷനും ഇമോഷനും വയലൻസിനും പ്രാധാന്യമുള്ളൊരു സിനിമയാകും ഇതെന്നാണ് ട്രെയിലർ നല്കുന്ന സൂചന. ചിത്രത്തില് ഇരട്ട വേഷത്തിലാകും യാഷെന്നും സൂചനയും ട്രെയിലർ നല്കുന്നുണ്ട്.
യഷും ഗീതു മോഹൻദാസും ചേർന്ന് തിരക്കഥ രചിച്ച്, ഗീതു മോഹൻദാസ് സംവിധാനം ചെയ്യുന്ന ചിത്രം കന്നഡയിലും ഇംഗ്ലീഷിലും ഒരേസമയം ചിത്രീകരിച്ചിട്ടുണ്ട്. ഹിന്ദി, തെലുങ്ക്, തമിഴ്, മലയാളം ഉള്പ്പെടെ നിരവധി ഭാഷകളില് ഡബ്ബ് പതിപ്പുകള് ഒരുക്കുന്ന ചിത്രം, ആഗോള പ്രേക്ഷകരെയാണ് ലക്ഷ്യമിടുന്നത്. സാങ്കേതികമായി മികച്ചൊരു ടീമും ചിത്രത്തിനുണ്ട്. 500 കോടിക്കും ആയിരം കോടിക്കും ഇടയില് എന്നാണ് ഈ സിനിമയുടെ ചെലവിനെക്കുറിച്ച് പുറത്തുവരുന്ന കണക്കുകള്.
