ചെന്നൈ: പ്രിയദര്ശന്റെ മലയാളത്തിലെ ബ്ലോക് ബസ്റ്റര് സിനിമ ‘ചിത്രം’ തമിഴില് റീമേക്ക് ചെയ്തപ്പോള് താനായിരുന്നു നായകനെന്നും എന്നാല് ആ സിനിമ വിജയിക്കില്ലെന്ന് ഉറപ്പായിരുന്നുവെന്നും വെളിപ്പെടുത്തി തമിഴ് നടന് സത്യരാജ്.
മോഹന്ലാലിനെപ്പോലെയുള്ള ക്യൂട്ട്നെസ് തനിക്കില്ലെന്നതാണ് സത്യരാജ് ഈ സിനിമ വിജയിക്കാതിരിക്കാനുള്ള കാരണമായി ചൂണ്ടിക്കാട്ടുന്നത്. മോഹന്ലാലിനെ പുകഴ്ത്തിക്കൊണ്ടുള്ള സത്യരാജിന്റെ തുറന്നു പറച്ചില് വലിയ വാര്ത്തയായിരിക്കുകയാണ്.
“ചിത്രം എന്ന സിനിമ ചെയ്യുമ്പോൾ തന്നെ അത് മലയാളം പതിപ്പിന്റെ വിജയം ആവർത്തിക്കില്ലെന്ന് അറിയാമായിരുന്നു. മോഹൻലാലിന്റെ പ്രകടനത്തിലുണ്ടായിരുന്ന ഒരു പ്രത്യേക ‘ക്യൂട്ട്നെസ്’ തനിക്കില്ലായിരുന്നു. അതാണ് ചിത്രത്തിന്റെ സ്വീകാര്യതയെ ബാധിച്ചത്. “- ഇതായിരുന്നു സത്യരാജിന്റെ വാക്കുകള്.
മലയാളത്തിൽ മോഹൻലാൽ അവതരിപ്പിച്ച കഥാപാത്രത്തിന്റെ നിഷ്കളങ്കതയും തമാശയും പ്രേക്ഷകരുമായി വളരെ എളുപ്പത്തിൽ കണക്റ്റ് ചെയ്തിരുന്നു. അതേ കഥാപാത്രത്തെ തമിഴിൽ അവതരിപ്പിക്കുമ്പോൾ ആ പ്രത്യേക ഭാവം തനിക്ക് പൂർണമായി കൊണ്ടുവരാൻ കഴിഞ്ഞില്ലെന്നാണ് സത്യരാജിന്റെ വെളിപ്പെടുത്തല്.
