ന്യൂഡൽഹി ; പാകിസ്ഥാനുമായി അതിർത്തി പങ്കിടുന്ന പഞ്ചാബ് ഗ്രാമങ്ങളിലെ സ്കൂളുകളിലും പഞ്ചായത്തുകളിലും സ്വാതന്ത്ര്യദിനം ആഘോഷിക്കാതെ ആം ആദ്മി സർക്കാർ . ദേശീയ മനുഷ്യാവകാശ കമ്മീഷൻ അംഗമായ പ്രിയങ്ക് കനൂംഗോയാണ് ഇക്കാര്യം വെളിപ്പെടുത്തിയത് .
ഈ സ്ഥലങ്ങളിൽ ദേശീയ പതാക ഉയർത്തിയിട്ടില്ലെന്നും ദേശീയഗാനം ആലപിച്ചിട്ടില്ലെന്നും അദ്ദേഹം പറഞ്ഞു.എക്സിലെ പോസ്റ്റിൽ, ആം ആദ്മി പാർട്ടി (എഎപി) ദേശീയ കൺവീനർ അരവിന്ദ് കെജ്രിവാളിനെയും പഞ്ചാബ് മുഖ്യമന്ത്രി ഭഗവന്ത് മന്നിനെയും കനൂംഗോ വിമർശിച്ചു.
എഎപി ചെയ്യുന്നത് “രാജ്യദ്രോഹം” ആണെന്ന് വിശേഷിപ്പിച്ച കനൂംഗോ പാകിസ്ഥാൻ അതിർത്തിയോട് ചേർന്നുള്ള ഗ്രാമങ്ങളിൽ ദേശീയോത്സവങ്ങൾ ശരിയായി ആചരിക്കാത്തത് എന്തുകൊണ്ടാണെന്ന് ചോദിച്ചു. സ്കൂളുകളിലും പഞ്ചായത്തുകളിലും ത്രിവർണ്ണ പതാക ഉയർത്താതിരിക്കുകയോ ദേശീയഗാനം ആലപിക്കാതിരിക്കുകയോ ചെയ്യുന്നത് ഗുരുതരമായ കാര്യമാണെന്നും അദ്ദേഹം പറഞ്ഞു.. ഇത് അനുവദിക്കില്ലെന്നും കർശനമായ നടപടി സ്വീകരിക്കുമെന്നും അദ്ദേഹം മുന്നറിയിപ്പ് നൽകി.
