കാലടി: കാലടി ശ്രീശങ്കരാചാര്യ സംസ്കൃത സര്വകലാശാലയിലെ വി.സി. വിരുദ്ധ അധിക്ഷേപ സമരം വിവാദത്തില്. സിന്ഡിക്കേറ്റ് യോഗം നടക്കുന്നതിനിടെയാണ് വനിതാ വൈസ് ചാന്സലറായ ഡോ. സിസാ തോമസിനെ അധിക്ഷേപിച്ച് എസ്എഫ്ഐക്കാര് ശവസംസ്കാര സമരം നടത്തിയത്.
സേവ് യൂണിവേഴ്സിറ്റി കാമ്പയിന് കമ്മിറ്റി ആഭ്യന്തരമന്ത്രിക്ക് പരാതി നല്കി. സര്വകലാശാലയുടെ പരമോന്നത പദവിയിലിരിക്കുന്ന വിസിക്ക് നേരെ നടത്തിയ ഹീനമായ സമരാഭാസം അവര്ക്ക് കടുത്ത മനോവേദനയും മാനസിക ആഘാതവുമാണ് സൃഷ്ടിച്ചതെന്ന് കമ്മിറ്റി അംഗങ്ങള് പരാതിയില് പറയുന്നു.
ഉന്നത വിദ്യാഭ്യാസ സ്ഥാപനങ്ങളില് ജനാധിപത്യപരമായ പ്രതിഷേധങ്ങള്ക്ക് പകരം വ്യക്തിഹത്യയും അദ്ധ്യാപകരെ ക്രൂരമായ മാനസിക പീഡനത്തിന് ഇരയാക്കുന്നതുമായ സമീപനമാണ് എസ്എഫ്ഐ തുടരുന്നത്.
2016ല് പാലക്കാട് വിക്ടോറിയ കോളജ് പ്രിന്സിപ്പലിന്
ശവകുടീരമൊരുക്കിയതും തിരുവനന്തപുരം ലോ കോളജ് വനിതാ പ്രിന്സിപ്പലിനെ തടഞ്ഞുവെച്ച് അധിക്ഷേപിച്ചതുമെല്ലാം ഇതിന് തെളിവാണ്. ഇത്തരം അധിക്ഷേപ സമരമാര്ഗങ്ങളെ തള്ളിപ്പറയാന് സിപിഎം നേതൃത്വം തയാറാകാത്തതാണ് ഇവ ആവര്ത്തിക്കാന് കാരണം.
വൈസ് ചാന്സലര്ക്ക് കടുത്ത മനോവേദനയുണ്ടാക്കിയ സംഭവത്തില് ഉത്തരവാദികളായ എസ്എഫ്ഐക്കാര്ക്കെതിരെയും കര്ത്തവ്യനിര്വഹണത്തില് വീഴ്ചവരുത്തിയ പോലീസ് ഉദ്യോഗസ്ഥര്ക്കെതിരെയും നിയമനടപടികള് സ്വീകരിക്കണമെന്നാണ് സേവ് യൂണിവേഴ്സിറ്റി കാമ്പയിന് കമ്മിറ്റിയുടെ ആവശ്യം.
