ലിസ്ബണ്: കാത്തിരിപ്പിന് വിരാമമിട്ട് പോർച്ചുഗീസ് ഫുട്ബോൾ സൂപ്പർ താരം ക്രിസ്റ്റ്യാനോ റൊണാൾഡോയും തന്റെ ദീർഘകാല പങ്കാളിയും മോഡലും ഇൻഫ്ലുവൻസറുമായ ജോർജിന റോഡ്രിഗസും വിവാഹിതരായി. പോർച്ചുഗല്ലിൽ വെച്ചാണ് വിവാഹച്ചടങ്ങുകൾ നടന്നത്. വിവാഹമോതിരമണിഞ്ഞ ഇരുവരുടെയും കൈകളുടെ ചിത്രം റൊണാൾഡോ തന്റെ ഇൻസ്റ്റാഗ്രാം അക്കൗണ്ടിൽ പങ്കുവെച്ചു.
പോർച്ചുഗലിന്റെ തലസ്ഥാനമായ ലിസ്ബണിന് അടുത്തുള്ള തീരദേശ നഗരമായ കാസ്കൈസിൽ ആഗസ്റ്റ് 11-നാണ് റൊണാൾഡോയും ജോർജിനയും വിവാഹിതരായത്. ഇരുവരുടെയും വിവാഹത്തെ ‘വെഡ്ഡിംഗ് ഓഫ് ദ ഇയർ’ എന്നാണ് പോർച്ചുഗീസ് മാധ്യമങ്ങൾ വിശേഷിപ്പിച്ചത്.
കുടുംബാംഗങ്ങളുടെ സാന്നിധ്യത്തിലായിരുന്നു വിവാഹച്ചടങ്ങ് നടന്നതെന്നും ആഘോഷങ്ങള് അതീവ സ്വകാര്യമായി സൂക്ഷിച്ചതായും റിപ്പോര്ട്ടുകള് പറയുന്നു. ജോര്ജിനയുടെ വിവാഹവസ്ത്രമോ ചടങ്ങിന്റെ വേദിയോ അതിഥിപ്പട്ടികയോ സംബന്ധിച്ച ഔദ്യോഗിക വിവരങ്ങള് ഇതുവരെ പുറത്തുവിട്ടിട്ടില്ല. ഇരുവരും വെള്ള വസ്ത്രങ്ങളിലായിരുന്നു ചടങ്ങില് പങ്കെടുത്തതെന്നാണ് വിവിധ അന്താരാഷ്ട്ര മാധ്യമങ്ങള് റിപ്പോര്ട്ട് ചെയ്യുന്നത്.
സ്പാനിഷ് ഫുട്ബോൾ ഭീമന്മാരായ റയൽ മാഡ്രിഡിൽ കളിക്കുന്ന കാലത്താണ് റൊണാൾഡോ അർജന്റീനിയൻ വംശജയായ ജോർജിനയെ ആദ്യമായി കണ്ടുമുട്ടുന്നത്. അതിനുശേഷം കഴിഞ്ഞ പത്ത് വർഷമായി ഇരുവരും ഒരുമിച്ചാണ് ജീവിക്കുന്നത്. മാഡ്രിഡിലെ ഒരു ഷോപ്പിൽ ജോർജിന ജോലി ചെയ്യുമ്പോഴാണ് റൊണാൾഡോയെ കണ്ടുമുട്ടിയത്.
‘തുടക്കത്തിൽ ഇത് ഇത്ര ശക്തമാകുമെന്നോ ഞാൻ അവളുമായി പ്രണയത്തിലാകുമെന്നോ കരുതിയിരുന്നില്ല, സത്യസന്ധമായി പറഞ്ഞാൽ ഞാൻ ഇത് പ്രതീക്ഷിച്ചില്ല. എന്നാൽ, കുറച്ചു നാളുകൾക്ക് ശേഷം, അവളാണ് എന്റെ ജീവിതത്തിലെ സ്ത്രീ എന്ന് എനിക്ക് തോന്നി’ ജോർജിനയുടെ നെറ്റ്ഫ്ലിക്സ് സീരീസായ ‘ഐ ആം ജോർജിന’യിൽ റൊണാൾഡോ മുമ്പ് പറഞ്ഞ വാക്കുകൾ ഇങ്ങനെ. 2025 ഓഗസ്റ്റ് 11-നാണ് ഇരുവരും വിവാഹനിശ്ചയത്തെ കുറിച്ചുള്ള വിവരം പങ്കുവെച്ചത്.
അലാന, ബെല്ല എന്നീ പെൺമക്കളുടെ മാതാപിതാക്കളാണ് റൊണാൾഡോയും റോഡ്രിഗസും. കൂടാതെ റൊണാൾഡോയുടെ മൂത്ത മക്കളായ ക്രിസ്റ്റ്യാനോ ജൂനിയർ, ഇരട്ടക്കുട്ടികളായ ഈവ മരിയ, മാറ്റിയോ എന്നിവരെയും ഇരുവരും ഒരുമിച്ചാണ് വളർത്തുന്നത്. മാഞ്ചസ്റ്റർ യുണൈറ്റഡിൽ റൊണാൾഡോയുടെ രണ്ടാം വരവിനിടെ 2022-ൽ ബെല്ലയുടെ ഇരട്ട സഹോദരനായ എഞ്ചൽ ജനിച്ച് അധികം വൈകാതെ മരിച്ചത് ഇരുവരെയും വലിയ ദുഃഖത്തിലാഴ്ത്തിയിരുന്നു.
ഫുട്ബോൾ ചരിത്രത്തിലെ എക്കാലത്തെയും മികച്ച കളിക്കാരിൽ ഒരാളായി കണക്കാക്കപ്പെടുന്ന താരമാണ് ക്രിസ്റ്റ്യാനോ റൊണാൾഡോ. നിലവിൽ സൗദി പ്രോ ലീഗിലെ അൽ-നസർ ക്ലബ്ബിനായാണ് താരം കളിക്കുന്നത്.
