യാഷ് ആരാധകർ ഏറെ പ്രതീക്ഷയോടെ കാത്തിരിക്കുന്ന സിനിമയാണ് ടോക്സിക്: എ ഫെയറി ടെയിൽ ഫോർ ഗ്രോൺ അപ്സ്. കെജിഎഫ് 2 വിന് ശേഷം റിലീസ് ചെയ്യുന്ന യാഷ് ചിത്രം. ഇന്ന് ഇന്ത്യൻ സിനിമാ രംഗത്ത് ഏറ്റവും താരമൂല്യമുള്ള നടൻമാരിൽ ഒരാളാണ് യാഷ്. കെജിഎഫ് 2 വിന് ശേഷം യാഷ് ഗീതു മോഹൻദാസ് സംവിധാനം ചെയ്യുന്ന ടോക്സിക്കിന് കമ്മിറ്റ് ചെയ്തപ്പോൾ സിനിമാ ലോകത്ത് പരക്കെ ചോദ്യങ്ങൾ വന്നു. കൊമേഴ്ഷ്യൽ സിനിമകളുടെ സംവിധായികയായല്ല ഗീതു മോഹൻദാസ് അറിയപ്പെടുന്നത്. ഈ കൂട്ടുകെട്ട് ഒരുമിച്ച് വരുമ്പോൾ എങ്ങനെയായിരിക്കുമെന്നറിയിൻ ഏവർക്കും ആകാംക്ഷയുണ്ട്. ട്രെയിലറിൽ നിന്നും ടോക്സിക്കിന്റെ കഥയെക്കുറിച്ച് യാതൊരു സൂചനയും ലഭിക്കുന്നില്ല.
യാഷിനൊപ്പം പ്രമുഖ നായിക നടിമാരാണ് ടോക്സിക്കിൽ അണിനിരക്കുന്നത്. അഭിനേതാക്കളുടെ പ്രതിഫലമാണ് ഇപ്പോൾ സിനിമാ ലോകത്തെ ചർച്ചാ വിഷയം. റിപ്പോർട്ടുകൾ പ്രകാരം 50 കോടി രൂപയാണ് യാഷ് വാങ്ങുന്ന പ്രതിഫലം. ടോക്സിക്കിന്റെ കോ പ്രൊഡ്യൂസറും കോ റെെറ്ററും കൂടിയാണ് യാഷ്. നായികനടിമാരിൽ ഏറ്റവും കൂടുതൽ പ്രതിഫലം നയൻതാരയ്ക്കാണ്. 12 കോടിക്കും 18 കോടിക്കും ഇടയിലാണ് നയൻതാരയുടെ പ്രതിഫലമെന്നാണ് റിപ്പോർട്ടുകൾ. 15 കോടി രൂപയാണ് കിയാര അദ്വാനിയുടെ പ്രതിഫലം. 5 കോടിയോളം രുഗ്മിണി വാസന്തിനും ഹുമ ഖുറേഷിക്കും താര സുതാര്യക്കും 3 കോടി രൂപ വീതവുമാണ് പ്രതിഫലമെന്നാണ് വിവരം.
ടോക്സിക്കിന്റെ ട്രെയിലറിൽ സ്ത്രീ വിരുദ്ധത പ്രകടമാണെന്ന ആരോപണം ഉയരുന്നുണ്ട്. സ്ത്രീ വിരുദ്ധതയ്ക്കെതിരെ സംസാരിക്കുന്ന ഗീതു മോഹൻദാസ് സ്വന്തം സിനിമയുടെ കാര്യത്തിൽ നിലപാടിൽ മാറ്റം വരുത്തിയെന്നും കുറ്റപ്പെടുത്തലുകളുണ്ടായി. മൂത്തോൻ ആണ് ഗീതു മോഹൻദാസിന്റെ ഒടുവിൽ പുറത്തിറങ്ങിയ സിനിമ. നിവിൻ പോളിയായിരുന്നു നായകൻ. 2019 ലാണ് മൂത്തോൻ പുറത്തിറങ്ങിയത്. നിരവധി ഫിലിം ഫെസ്റ്റിവലുകളിൽ മൂത്തോൻ പ്രശംസ നേടി. അതേസമയം ചിത്രം ബോക്സ് ഓഫീസിൽ നേട്ടമുണ്ടാക്കിയില്ല. പിരിയഡ് ഗ്യാങ്സ്റ്റർ ചിത്രമാണ് ടോക്സിക്ക്. യാഷ് നായകനായെത്തുന്ന 19ാമത്തെ ചിത്രമാണ് ടോക്സിക്. ആഗസ്റ്റ് 26 ന് ചിത്രം തിയറ്ററുകളിലെത്തും.
