ന്യൂദല്ഹി: നീറ്റ് ചോദ്യ പേപ്പര് ചോര്ന്ന കേസിലെ സാമ്പത്തിക ഇടപാടുകളില് എന്ഫോഴ്സ്മെന്റ് ഡയറക്ടറേറ്റ് (ഇ ഡി) അന്വേഷണം ആരംഭിച്ചു. ചോദ്യ പേപ്പര് ചോര്ത്തി വിറ്റതില് വന് സാമ്പത്തിക ഇടപാടുകള് നടന്നെന്ന സിബിഐ കണ്ടെത്തലിനെ തുടര്ന്നാണിത്. ഇതിന്റെ ഭാഗമായി രാജസ്ഥാന്, ഹരിയാന, ആസാം, ബീഹാര്, കര്ണാടക, മഹാരാഷ്ട്ര, ഝാര്ഖണ്ഡ് സംസ്ഥാനങ്ങളിലെ പേപ്പര് ചോര്ച്ച കേസുകളില് ഇ ഡി, ഇസിഐആര് രജിസ്റ്റര് ചെയ്തു.
ചോര്ച്ചയുടെ പ്രധാന കേന്ദ്രം മഹാരാഷ്ട്രയാണെന്നും ഇവിടെ നിന്നാണ് രാജസ്ഥാന്, ഹരിയാന, കേരളം തുടങ്ങിയ സംസ്ഥാനങ്ങളിലേക്ക് ചോദ്യപ്പേപ്പര് പ്രചരിച്ചതെന്നും സിബിഐ അന്വേഷണത്തില് കണ്ടെത്തി. അതിനാല് മഹാരാഷ്ട്ര കേന്ദ്രീകരിച്ചാണ് ഇ ഡി അന്വേഷണം ആരംഭിച്ചത്. സിബിഐ അറസ്റ്റ് ചെയ്ത മഹാരാഷ്ട്രയിലെ രേണുകാചാര്യ കോച്ചിങ് സെന്റര് ഉടമ ശിവജി മോത്തെഗാവോങ്കര് വലിയ തോതില് സ്വത്ത് സമ്പാദിച്ചെന്നു കണ്ടെത്തിയിട്ടുണ്ട്. ലാത്തൂര്, നാസിക്, നാന്ദേഡ്, പൂനെ, മറ്റു മെട്രോ നഗരങ്ങള് എന്നിവിടങ്ങളില് വസ്തുവും കെട്ടിടങ്ങളും വിവാഹ മണ്ഡപങ്ങളും ഇയാള് വാങ്ങി. വിവിധ ഇടങ്ങളില് വന്നിക്ഷേപങ്ങളും നടത്തി. ഇവ നീറ്റ്, ജെഇഇ കോച്ചിങ് ക്ലാസുകള് നടത്തി സമ്പാദിക്കാനാകില്ല. ചോദ്യ പേപ്പര് ചോര്ത്തി വിറ്റതു പോലെ കൂടുതല് ചോദ്യ പേപ്പറുകള് വിറ്റുള്ള സമ്പാദ്യമാണെന്നാണ് സൂചന. ശിവജി മോത്തെഗാവോങ്കറുടെയും ബന്ധുക്കളുടെയും ബാങ്ക് അക്കൗണ്ടുകള് ഇ ഡി പരിശോധിക്കുന്നുണ്ട്. ചോദ്യ പേപ്പര് ലഭിക്കാന് വിദ്യാര്ത്ഥികളുടെ മാതാപിതാക്കള് നല്കിയ തുകയും ഇ ഡി പരിശോധിക്കുന്നു. ദേശീയ ടെസ്റ്റിങ് ഏജന്സിയില് നിന്നു ചോദ്യം ചോര്ത്തിയ കെമിസ്ട്രി വിദഗ്ധന് പി.വി. കുല്ക്കര്ണിയുടെ ബാങ്ക് അക്കൗണ്ടുകളും സാമ്പത്തിക ഇടപാടുകളിലും ഇ ഡി അന്വേഷണം ആരംഭിച്ചു.
ചോദ്യ പേപ്പര് ചോര്ച്ച കേസില് തങ്ങളെ നുണ പരിശോധനയ്ക്ക് വിധേയമാക്കണമെന്ന മൂന്ന് പ്രതികളുടെ ഹര്ജി പ്രത്യേക ഫാസ്റ്റ് ട്രാക്ക് കോടതി തള്ളി. നുണ പരിശോധന, ബ്രെയിന് മാപ്പിങ് എന്നിവ നടത്തണമെന്നാണ് പ്രതികള് മംഗള് ലാല് ബിവാള്, ദിനേഷ് ബിവാള്, വികാസ് ബിവാള് എന്നിവര് ആവശ്യപ്പെട്ടത്. എന്നാല് പ്രത്യേക ജഡ്ജ് അജയ് ഗുപ്ത ഹര്ജി തള്ളി. നീറ്റ് ചോദ്യ പേപ്പര് ചോര്ച്ച കേസില് 13 പ്രതികള്ക്കെതിരേ സിബിഐ സമര്പ്പിച്ച കുറ്റപത്രം പ്രത്യേക ഫാസ്റ്റ് ട്രാക്ക് കോടതി ഇന്നു പരിഗണിക്കും.
