ന്യൂദല്‍ഹി:തായ്ലന്‍ഡിലെ ഫുക്കറ്റില്‍ നിന്ന് ദല്‍ഹിയിലേക്കുള്ള യാത്രയ്‌ക്കിടെ എയര്‍ ഇന്ത്യ വിമാനം 300 അടിയോളം താഴേക്ക് പതിച്ച സംഭവത്തില്‍ പൈലറ്റ് കഞ്ചാവ് ഉപയോഗിച്ചതായി സ്ഥിരീകരണം.എഐ 2379 – എയര്‍ ഇന്ത്യ വിമാനത്തിലെ പൈലറ്റ് ഇന്‍ കമാന്‍ഡ് ആണ് കഞ്ചാവ് ഉപയോഗിച്ചിരുന്നെന്ന് വ്യക്തമായത്. വിമാനം ദല്‍ഹിയില്‍ ഇറങ്ങിയ ശേഷം നടത്തിയ ആദ്യഘട്ടം പരിശോധനയില്‍ ലഹരി സാന്നിധ്യം കണ്ടെത്തിയതിനെ തുടര്‍ന്ന് സാമ്പിള്‍ വിശദമായ പരിശോധനയ്‌ക്ക് അയച്ചു. ഇതിന്റെ ഫലമാണ് ഇപ്പോള്‍ പുറത്തുവന്നത്.
ആഗസ്റ്റ് നാലിന് നടന്ന സംഭവത്തില്‍ 24 പേര്‍ക്ക് പരിക്കേറ്റിരുന്നു. 137 യാത്രക്കാരും എട്ടു ജീവനക്കാരുമാണ് വിമാനത്തിലുണ്ടായിരുന്നത്. വിമാനം പെട്ടെന്ന് നിയന്ത്രണംവിട്ടു താഴേക്കു പതിച്ചു. അന്തരീക്ഷ വ്യതിയാനമാണ് കാരണമെന്നായിരുന്നു എയര്‍ ഇന്ത്യ ആദ്യം നല്‍കിയ വിശദീകരണം. എന്നാല്‍ പൈലറ്റ് ലഹരി ഉപയോഗിച്ചെന്ന് കണ്ടതോടെ സംഭവം അതീവ ഗൗരവമുള്ളതായി അധികൃതര്‍ കണക്കിലെടുത്തു.
സംഭവത്തില്‍, എയര്‍ക്രാഫ്റ്റ് ആക്‌സിഡന്റ് ഇന്‍വെസ്റ്റിഗേഷന്‍ ബ്യൂറോ (എഎഐബി) വിശദമായ അന്വേഷണം ആരംഭിച്ചു. അന്വേഷണം പൂര്‍ത്തിയാകുന്നതുവരെ വിമാനത്തിലുണ്ടായിരുന്ന രണ്ട് പൈലറ്റുമാരെയും ഡ്യൂട്ടിയില്‍നിന്ന് ഒഴിവാക്കി. പരിക്കേറ്റ ജീവനക്കാരില്‍ രണ്ടു പേര്‍ ഇപ്പോഴും ആശുപത്രിയയിലാണ്. അന്വേഷണ റിപ്പോര്‍ട്ടും ലാബ് ഫലങ്ങളും അടിസ്ഥാനമാക്കി പൈലറ്റിനെതിരെ കര്‍ശന നടപടികള്‍ സ്വീകരിക്കുമെന്ന് വ്യോമയാന മന്ത്രാലയം വ്യക്തമാക്കി.
