കൊച്ചി: സ്ത്രീകള്ക്ക് സൗജന്യയാത്ര അനുവദിക്കുന്ന പ്രിയദര്ശിനി ബസുകളില് മുഖംമറയ്ക്കുന്ന നിക്കാബും ബുര്ഖയും നിരോധിക്കുന്നതാണ് നല്ലതെന്ന് സാമൂഹ്യനിരീക്ഷകനായ എ.പി. അഹമ്മദ് മാഷ്. ഇക്കാര്യത്തില് കോണ്ഗ്രസുകാരന് കൂടിയായ സാംസ്കാരിക പ്രവര്ത്തകനായ എം.എന്. കാരശ്ശേരി മാഷ് പ്രകടിപ്പിച്ച അഭിപ്രായത്തെ പിന്താങ്ങിക്കൊണ്ടാണ് എ.പി. അഹമ്മദ് മാഷ് പ്രതികരിച്ചിരിക്കുന്നത്.
ബുര്ഖയും നികാബും ധരിച്ച് പുരുഷന്മാര് പ്രിയദര്ശിനി ബസുകളില് കയറിക്കൂടാന് സാധ്യതയുണ്ടെന്നും ഇവരെ തിരിച്ചറിയാന് ബുദ്ധിമുട്ടാണെന്നും അതിനാല് ഈ ബസുകളില് ബുര്ഖ നിരോധിക്കണമെന്നും എം.എന്. കാരശ്ശേരി മാഷ് കഴിഞ്ഞ ദിവസം പ്രസ്താവിച്ചിരുന്നു.
പ്രിയദര്ശിനി ബസുകളിലെ പത്ത് രൂപ ടിക്കറ്റിന് വേണ്ടി 800 രൂപ കൊടുത്ത് ആരെങ്കിലും ബുര്ഖ ധരിക്കുമോ എന്ന ചോദ്യമാണ് ഒരു ഉസ്താദ് ചോദിച്ചത്. ക്രിമിനല് കുറ്റം ചെയ്യുന്നവര് സ്ഥിരമായി എന്നെന്നേയ്ക്കുമായി പര്ദ്ദയും ബുര്ഖയും വാങ്ങിവെച്ചിട്ടുണ്ടായിരിക്കുമെന്നാണ് ഇക്കാര്യത്തില് ഉസ്താദിന് എ.പി. അഹമ്മദ് മാഷ് മറുപടി നല്കുന്നത്. പത്ത് രൂപയുടെ ടിക്കറ്റ് മാത്രമല്ല, കോഴിക്കോട് നിന്നും മൂന്നാറിലേക്ക് പോകുന്ന പ്രിയദര്ശിനി ബസ് ഫുള് ആണ്. ഇതില് 200 രൂപയ്ക്ക് മുകളിലാണ് ടിക്കറ്റ് നിരക്ക്. – എ.പി. അഹമ്മദ് ചൂണ്ടിക്കാട്ടുന്നു.
