കൊച്ചി: കേരളത്തിന്റെ ആഘോഷമായ ഓണവേളയോടനുബന്ധിച്ച് ഉപഭോക്താക്കൾക്കായി പ്രത്യേക ഉത്സവകാല ഓഫറുകൾ പ്രഖ്യാപിച്ച് ഇന്ത്യ യമഹ മോട്ടോർ. സംസ്ഥാനത്തുടനീളമുള്ള യമഹയുടെ അംഗീകൃത ഡീലർഷിപ്പുകൾ വഴി പ്രീമിയം മോട്ടോർസൈക്കിളുകളായ എക്സ്എസ്ആർ155, ഹൈബ്രിഡ് സ്കൂട്ടർ നിര എന്നിവയിൽ എക്സ്ക്ലൂസീവ് ക്യാഷ്ബാക്ക്, ഇൻഷുറൻസ് ആനുകൂല്യങ്ങൾ, എളുപ്പത്തിലുള്ള ഫിനാൻസ് ഓപ്ഷനുകൾ എന്നിവ കമ്പനി ലഭ്യമാക്കുന്നുണ്ട്.
പുതിയൊരു യമഹ വാഹനം സ്വന്തമാക്കാൻ ആഗ്രഹിക്കുന്നവർക്ക് ഈ ഉത്സവ സീസൺ കൂടുതൽ പ്രയോജനപ്പെടുത്തുന്നതിനാണ് ഈ പ്രത്യേക പദ്ധതികൾ ലക്ഷ്യമിടുന്നത്. ഈ ഓണം സ്പെഷ്യൽ ഓഫറുകളുടെ ഭാഗമായി യമഹ എക്സ്എസ്ആർ155 മോട്ടോർസൈക്കിളിന് 7,000 രൂപയും, റേസെഡ്ആർ 125 എഫ്ഐ ഹൈബ്രിഡ്, റേസെഡ്ആർ 125 എഫ്ഐ ഹൈബ്രിഡ് സ്ട്രീറ്റ് റാലി, ഫാസിനോ 125 എഫ്ഐ ഹൈബ്രിഡ് ഉൾപ്പെടെയുള്ള ഹൈബ്രിഡ് സ്കൂട്ടർ ശ്രേണിക്ക് 4,000 രൂപയും ക്യാഷ്ബാക്ക് ലഭിക്കും.
ക്യാഷ്ബാക്ക് ഓഫറുകൾക്ക് പുറമേ, ഉപഭോക്താക്കൾക്ക് വലിയ സാമ്പത്തിക ഭാരമില്ലാതെ വാഹനം സ്വന്തമാക്കാനായി ആകർഷകമായ റീട്ടെൈൽ ഫിനാൻസ് സ്കീമുകളും യമഹ അവതരിപ്പിച്ചിട്ടുണ്ട്. കുറഞ്ഞ ഡൗൺ പേയ്‌മെന്റിൽ വാഹനം വീടുകളിലെത്തിക്കാൻ സഹായിക്കുന്ന ഈ പദ്ധതിയിലൂടെ 3,999 രൂപ മുതൽ ആരംഭിക്കുന്ന ഡൗൺ പേയ്‌മെന്റിൽ യമഹ സ്‌കൂട്ടറുകൾ സ്വന്തമാക്കാം.
അതേസമയം, ജനപ്രിയ എഫ്സെഡ് സീരീസും എക്സ്എസ്ആർ155-ഉം 6,999 രൂപ മുതൽ ആരംഭിക്കുന്ന ഡൗൺ പേയ്‌മെന്റ് ഓപ്ഷനുകളിൽ ലഭ്യമാണ്. ഇതിനുപുറമേ, ഹൈബ്രിഡ് സ്കൂട്ടർ ശ്രേണിക്ക് 7,000 രൂപ വരെയും, എക്സ്എസ്ആർ155-ന് 12,000 രൂപ വരെയും ആകർഷകമായ ഇൻഷുറൻസ് ആനുകൂല്യങ്ങളും കമ്പനി വാഗ്ദാനം ചെയ്യുന്നുണ്ട്.
വൈസെഡ്എഫ്-ആർ15എം, എംടി-15 വി2, എഫ്സെഡ് സീരീസ്, എയ്റോക്സ് 155, ഫാസിനോ, റേസെഡ്ആർ തുടങ്ങിയ വിവിധതരം മോട്ടോർസൈക്കിളുകളും സ്കൂട്ടറുകളും അടങ്ങുന്ന വിപുലമായ ഉൽപ്പന്ന നിരയാണ് യമഹയ്‌ക്കുള്ളത്. പരിമിത കാലത്തേക്ക് മാത്രം ലഭ്യമായ ഈ ഓണം ഓഫറുകൾ പ്രയോജനപ്പെടുത്തി ഉപഭോക്താക്കൾക്ക് കൂടുതൽ ആവേശത്തോടെ ഈ ഓണം ആഘോഷമാക്കാവുന്നതാണ്.
