തിരുവനന്തപുരം: നിയമപോരാട്ടങ്ങള്ക്കൊടുവില്, സസ്പെന്ഷനില് നിന്ന് കോവളം എഫ്സിക്കും ആ ക്ലബ്ബിന്റെ എല്ലാമെല്ലാമായ എബിന് റോസിനും ആശ്വാസം. കേരളാ പ്രീമിയര് ലീഗില് (കെപിഎല്) വമ്പന്മാരുടെ ക്ലബ്ബുകള്ക്കിടയില് സാധാരണക്കാരായവര് അടങ്ങിയ ടീമായിരുന്നു കോവളം എഫ്സി. എറണാകുളം മുതല് തിരുവനന്തപുരം വരെയുള്ള ജില്ലകള് പരിശോധിച്ചാല് കെപിഎല് കളിക്കുന്ന ഒരേയൊരു ടീമാണ് കോവളം എഫ്സി.
ഇക്കഴിഞ്ഞ ഏപ്രില് 28ന് ഇന്റര് കേരളാ ടീമിനെതിരേ മത്സരിച്ച് വിജയിച്ച് കെപിഎല് സൂപ്പര് എട്ടിലേക്ക് യോഗ്യത നേടിയ ഈ ടീമിനെതിരെ പരാതി ഉയര്ന്നിരുന്നു. കോവളം എഫ്സിയിലെ ഒരു താരത്തിന്റെ രജിസ്ട്രേഷന് പൂര്ണമായില്ലയെന്നും ആ കളിക്കാരനെ മൈതാനത്തിറക്കി എന്നും കാണിച്ച് എതിര് ടീം പരാതി നല്കി. പരാതി നല്കിയത് മാനദണ്ഡപ്രകാരമല്ലെന്നും എന്നാല്, പരാതിയില് കഴമ്പുണ്ടെന്നും അച്ചടക്ക സമിതി കണ്ടെത്തി. ഇതേത്തുടര്ന്ന് കേരള ഫുട്ബോള് അസോസിയേഷന് ഭരണസമിതിയില് വിഷയം ചര്ച്ചയ്ക്കെടുക്കുകയും കോവളം എഫ്സിയെ സസ്പെന്ഡ് ചെയ്യുകയും ചെയ്തു. ഇടതുരാഷ്ട്രീയ സ്വാധീനമുള്ളവര് ടീമിനെ സസ്പെന്ഡ് ചെയ്യണമെന്ന് ശക്തമായി ആവശ്യപ്പെടുകയായിരുന്നു.
എന്നാല്, മറ്റ് ക്ലബ്ബുകളെ പ്രതിനിധീകരിച്ചെത്തിയവര് അത്തരത്തിലുള്ള സസ്പെന്ഷന് നിയമ സാധുതയില്ലെന്നും വാദിച്ചു. പിന്നാലെ പ്രശ്നം കെഎഫ്എ അപ്പീല് കമ്മിറ്റിക്കുവിടുകയുമായിരുന്നു. മാത്രവുമല്ല, സാമൂഹ്യമാധ്യമങ്ങളും മറ്റ് സ്രോതസ്സുകളും വഴി ചിലരും അവരുടെ സുഹൃത്തുക്കളും കോവളം എഫ്സിക്കെതിരെ മോശം പ്രചരണം നടത്തുകയും മറ്റ് ഫുട്ബോള് അസോസിയേഷനുകളെ തെറ്റിദ്ധരിപ്പിക്കുകയും ചെയ്തുവെന്ന് കോച്ച് എബിന് റോസ് ചൂണ്ടിക്കാട്ടി. രാഷ്ട്രീയ സ്വാധീനം മൂലം മറ്റ് മാധ്യമങ്ങളില് സംഭവത്തെക്കുറിച്ച് തെറ്റായ വാര്ത്ത പ്രചരിപ്പിക്കുകയും ചെയ്തുവെന്ന് എബിന് പറയുന്നു. രാഷ്ട്രീയ പ്രേരിതമായ പല തീരുമാനങ്ങളുമാണ് കോവളം എഫ്.സിക്കെതിരെ ഇത്തരത്തിലൊരു നടപടിയുണ്ടാകാനും കാരണം. എന്നാല് കേരളാ ഫുട്ബോള് അസോസിയേഷന് അധികാരികള് കൃത്യമായി വിഷയം മനസിലാക്കി പിന്നീട് അപ്പീല് നല്കാന് കോവളം എഫ്.സിയോട് ആവശ്യപ്പെടുകയും ചെയ്തു. ഒരു ഔദ്യോഗിക രേഖയോ സര്ക്കുലറോ കൂടാതെ കോവളം എഫ്.സിയുടെ സസ്പെന്ഷനെ സംബന്ധിച്ച വിവരം വാട്സാപ് സന്ദേശം വഴിയാണ് തിരുവനന്തപുരം ജില്ലാ ഫുട്ബോള് അസോസിയേഷന് സെക്രട്ടറി അറിയിച്ചത്. ഒടുവില് നിയമപരമായ പോരാട്ടങ്ങള്ക്കൊടുവില് സസ്പെന്ഷന് പിന്വലിക്കുകയും ചെയ്തു. എന്നാല് സസ്പെന്ഷന് പിന്വലിച്ചശേഷവും തിരുവനന്തപുരം ജില്ലാ ഫുട്ബോള് അസോസിയേഷന്റെ വാട്സാപ് ഗ്രൂപ്പിലോ മറ്റ് കൂട്ടായ്മകളിലോ ടീമിനെ ചേര്ക്കാന്, തിരുവനന്തപുരം ഫുട്ബോള് അസോസിയേഷന് സെക്രട്ടറി തയാറായില്ല. കൂടാതെ കോവളം എഫ്സിയുടെ കോച്ചായ തനിക്കെതിരെ അച്ചടക്ക നടപടിയുണ്ടെന്നാണ് പരത്തുന്നതെന്ന് എബിന് ആരോപിച്ചു. ഇതിനെതിരേ ഇപ്പോള് കോവളം എഫ്സി, മാനനഷ്ടക്കേസ് ഫയല് ചെയ്യാനൊരുങ്ങുകയാണ്. ഭാവിയില് തങ്ങള്ക്ക് കിട്ടാനുള്ള സ്പോണ്സര്ഷിപ്പുകള് വരെ തടയണമെന്ന ഉദ്ദേശ്യത്താടെയാണ് ഇതൊക്കെ ചെയ്യുന്നതെന്ന് എബിന് ചൂണ്ടിക്കാട്ടി. ശരിക്കൊപ്പം നിലകൊണ്ട കേരള ഫുട്ബോള് അസോസിയേഷനും അപ്പീല് കമ്മിറ്റിക്കും എബിന് നന്ദി അറിയിച്ചു.
