തൃശൂര്: കേരള പ്രീമിയര് ലീഗ് (കെപിഎല്) സൂപ്പര് 8 പോരാട്ടത്തില് കാലിക്കറ്റ് എഫ്സിയുടെ അപരാജിത മുന്നേറ്റം തുടരുന്നു. തൃശൂര് കോര്പ്പറേഷന് സ്റ്റേഡിയത്തില് നടന്ന ആവേശപ്പോരാട്ടത്തില് ഇഎംഇഎ കോളേജിനെ ഏകപക്ഷീയമായ ഒരു ഗോളിന് തകര്ത്ത് കാലിക്കറ്റ് ജയമാഘോഷിച്ചു.
പകരക്കാരനായി ഇറങ്ങി 72-ാം മിനിറ്റില് വലകുലുക്കിയ അരുണ് കുമാറാണ് കാലിക്കറ്റിന്റെ വിജയശില്പി. സൂപ്പര് 8 ഘട്ടത്തില് ടീമിന്റെ തുടര്ച്ചയായ മൂന്നാം ജയമാണിത്. ഈ വിജയത്തോടെ സൂപ്പര് എട്ടില് തുടര്ച്ചയായ മൂന്നാം ജയവും സ്വന്തമാക്കിയ കാലിക്കറ്റ് പോയിന്റ് പട്ടികയില് ഒന്നാം സ്ഥാനം ഭദ്രമാക്കി.
സൂപ്പര് എട്ടിലെ തങ്ങളുടെ അടുത്ത അങ്കത്തില് മെയ് 17ന് കരുത്തരായ കേരള പോലീസ് ഫുട്ബോള് ടീമിനെയാണ് കാലിക്കറ്റ് എഫ്സി നേരിടുക. പരാജയമറിയാതെയുള്ള ഈ കുതിപ്പ് പോലീസിനെതിരെയും തുടരാനാകുമെന്ന തികഞ്ഞ ആത്മവിശ്വാസത്തിലാണ് കാലിക്കറ്റ് എഫ്സി.
