ന്യൂദല്ഹി: വീണ്ടും ഇൻസ്റ്റഗ്രാം വീഡിയോയുമായി പ്രധാനമന്ത്രി നരേന്ദ്ര മോദി. വ്യാഴാഴ്ച രാത്രി വൈകിയാണ് മോദി പുതിയ വീഡിയോ പങ്കുവെച്ചത്. ദേശീയ കൈത്തറി ദിനത്തോടനുബന്ധിച്ചാണ് പ്രധാനമന്ത്രി വീഡിയോ പോസ്റ്റ് ചെയ്തത്. ഫ്രണ്ട്ഷിപ്പ് ഡേ ആഘോഷിക്കുന്ന അതേ ആവേശത്തോടെ ദേശീയ കൈത്തറി ദിനവും ആഘോഷിക്കാൻ മോദി ജനങ്ങളോട് വീഡിയോയിലൂടെ അഭ്യർഥിച്ചു.
ഇൻസ്റ്റഗ്രാമിൽ ട്രെൻഡിങ്ങായ ‘ഗെറ്റ് റെഡി വിത്ത് മി’ (ജിആർഡബ്ല്യുഎം) ചെയ്യാനുള്ള ആഹ്വാനവും മോദി നടത്തി. ദേശീയ കൈത്തറി ദിനമായ ഓഗസ്റ്റ് ഏഴിന് കൈത്തറി വസ്ത്രങ്ങൾ ധരിച്ച് ജിആർഡബ്ല്യുഎം വീഡിയോകൾ നിർമിച്ച് പങ്കുവെക്കണം എന്നാണ് പ്രധാനമന്ത്രി യുവാക്കളോട് ആഹ്വാനം ചെയ്തത്.
ഭാരതത്തിന്റെ സമ്പന്നമായ കൈത്തറി പാരമ്പര്യത്തെ ആദരിക്കാന് എല്ലാവരും ഒത്തുചേരണമെന്ന് പറഞ്ഞ മോദി കൈത്തറി ഉല്പ്പന്നങ്ങള് വാങ്ങാനും ധരിക്കാനും എല്ലാവരെയും പ്രോത്സാഹിപ്പിച്ചു. കൈത്തറി ഉല്പ്പന്നങ്ങള് വാങ്ങുന്നത് രാജ്യത്തിന്റെ നൂറ്റാണ്ടുകള് പഴക്കമുള്ള സാംസ്കാരിക പൈതൃകം സംരക്ഷിക്കുന്നതിനൊപ്പം ലക്ഷക്കണക്കിന് നെയ്ത്തുകാരുടെ ഉപജീവനമാര്ഗ്ഗം ശക്തിപ്പെടുത്തുന്നുവെന്നും മോദി കൂട്ടിച്ചേർത്തു. ‘നിങ്ങള് സൗഹൃദ ദിനം വളരെ ഊഷ്മളമായി ആഘോഷിച്ചതുപോലെ, കൈത്തറി ദിനവും ആഘോഷിക്കൂ,’ എന്ന് പ്രധാനമന്ത്രി പറഞ്ഞു.
കൈത്തറി ഉത്പന്നങ്ങൾ കേവലം ഫാഷനല്ല. രാജ്യത്തെ നെയ്ത്ത് തൊഴിലാളികൾക്കുള്ള പിന്തുണയും ‘വോക്കൽ ഫോർ ലോക്കൽ’ മനോഭാവം പ്രോത്സാഹിപ്പിക്കുന്നതിനുള്ള മാർഗവുമാണെന്നും മോദി വീഡിയോയിൽ പറഞ്ഞു.
