മില്മയുടെ പേരില് പ്രചരിക്കുന്ന വ്യാജ ലിങ്കിന്റെ ചിത്രം
തിരുവനന്തപുരം: ‘മില്മയുടെ സ്വാതന്ത്ര്യദിന സമ്മാനം’ എന്ന പേരില് വാട്സ്ആപ്പില് പ്രചരിക്കുന്ന സന്ദേശം/ലിങ്ക് വ്യാജമാണെന്ന് അധികൃതര് അറിയിച്ചു. ഇത്തരം വ്യാജ സന്ദേശങ്ങളാല് കബളിപ്പിക്കപ്പെടാതിരിക്കാന് പൊതുജനങ്ങള് ജാഗ്രത പാലിക്കണം. ഇത്തരം വ്യാജ ലിങ്ക്/സന്ദേശത്തിനെതിരെ മില്മ തങ്ങളുടെ ഔദ്യോഗിക സോഷ്യല് മീഡിയ അക്കൗണ്ടുകള് വഴി മുന്നറിയിപ്പ് നല്കിയിട്ടുണ്ട്.
46 വര്ഷത്തെ പാരമ്പര്യമുള്ള മില്മയുടെ പ്രശസ്തിക്കും വിശ്വാസ്യതയ്ക്കും കളങ്കമുണ്ടാക്കുന്ന രീതിയില് തെറ്റിദ്ധാരണ പരത്തുന്ന സന്ദേശം/ലിങ്ക് സാമൂഹ്യ മാധ്യമങ്ങളില് നിന്ന് നീക്കാന് നിയമനടപടി സ്വീകരിക്കുമെന്ന് മില്മ അറിയിച്ചു. ഇത് സംബന്ധിച്ച പരാതി മില്മ അധികൃതര് പോലീസിന് കൈമാറിയിട്ടുണ്ട്. കുറച്ചു മാസങ്ങള്ക്ക് മുന്പ് ‘മില്മ വാര്ഷികാഘോഷ സമ്മാനം’ എന്ന പേരില് സമാനമായ ഒരു വ്യാജ ലിങ്ക് വാട്സ്ആപ്പ് ഗ്രൂപ്പുകളില് പ്രചരിച്ചിരുന്നു. പിന്നീട് മില്മ സ്വീകരിച്ച നിയമപരമായ നടപടികളെ തുടര്ന്ന് അത് നീക്കം ചെയ്തു.
