ചെന്നൈ: എസ് ആര്‍ പ്രകാശ് ബാബു, എസ് ആര്‍ പ്രഭും എന്നിവര്‍ നിര്‍മ്മിച്ച സിനിമ കറുപ്പില്‍ നായകന്‍ മാത്രമാണ് സൂര്യയെങ്കിലും അവസാന നിമിഷം സാമ്പത്തികപ്രതിസന്ധിയില്‍പെട്ടപ്പോള്‍ ലോണെടുത്ത് സഹായിച്ചത് സൂര്യ. ഇക്കാര്യം ഈയിടെ സൂര്യ ഒരു യൂട്യുബ് ചാനലിന് നല്‍കിയ അഭിമുഖത്തില്‍ തുറന്നുപറഞ്ഞിരുന്നു. പണം സമാഹരിക്കാന്‍ കഴിയാതെ വന്നപ്പോള്‍ സൂര്യയെ സഹായിച്ചത് ഭാര്യജ്യോതികയാണ്. അതിന് നന്ദി പറയുകയാണിപ്പോള്‍ സൂര്യ.
120-130 കോടിയില്‍ പൂര്‍ത്തിയാക്കിയ കറുപ്പ് നേടിയ ബോക്സോഫീസ് കളക്ഷന്‍ 305 കോടി രൂപയാണ്. സൂര്യയ്‌ക്ക് പത്ത് വര്‍ഷങ്ങള്‍ക്ക് ശേഷം കിട്ടിയസൂപ്പര്‍ ഹിറ്റായിരുന്നു ഈ പടം. സാമ്പത്തിക പ്രയാസം കാരണം പ്രഖ്യാപിച്ച ദിവസം റിലീസ് ചെയ്യാൻ കഴിഞ്ഞില്ല. പക്ഷെ എല്ലാ പ്രതിസന്ധികളും തരണം ചെയ്ത് തീയേറ്ററില്‍ എത്തിയപ്പോള്‍ വന്‍ലാഭവും.
“ഒരിക്കല്‍ കൂടി ഇവള്‍ക്ക് നന്ദി പറയുകയാണ്. ഒരുപാട് സാമ്പത്തിക പ്രതിസന്ധിയുണ്ടായിരുന്നു. അവസാന സമയത്ത് എനിക്ക് ഒരുപാട് ലോണ്‍ എടുക്കേണ്ടി വന്നു. ആ സമയത്ത് ഇവള്‍ എന്നെ വിശ്വസിക്കുകയും അതിന് അനുവദിക്കുകയും ചെയ്തു. എന്തെങ്കിലും സംഭവിച്ചാല്‍ കുടുംബം എന്ന നിലയില്‍ ഞങ്ങള്‍ ആയിരിക്കും ബുദ്ധിമുട്ടുക. ചിലപ്പോഴൊക്കെ, ഇത്രയും കാലം ഇന്‍ഡസ്ട്രിയില്‍ നിന്നതിനാല്‍ അറിയാം, കാര്യങ്ങള്‍ നമ്മുടെ നിയന്ത്രണത്തിന് അതീതമായിരിക്കും. ഒരു ലീപ്പ് ഓഫ് ഫെയ്ത് ആണ്. ഇത് ചെയ്യാനാകും, ലോണ്‍ തിരിച്ചടയ്‌ക്കാനാകും എന്ന് വിശ്വസിക്കുകയാണ്. എനിക്കത് വലിയൊരു ചുവടുവെപ്പായിരുന്നു.” ജ്യോതികയെ പുകഴ്‌ത്തിക്കൊണ്ട് സൂര്യ പറയുന്നു.
