കൊച്ചി: ആയുഷ് ചികിത്സ വിഭാഗങ്ങള്ക്കായി കേരളത്തില് പ്രത്യേക മന്ത്രാലയം രൂപീകരിക്കണമെന്ന് വിശ്വ ആയുര്വേദ പരിഷത്ത് സംസ്ഥാന നേതൃ യോഗം അംഗീകരിച്ച പ്രമേയം കേരള സര്ക്കാരിനോട് ആവശ്യപ്പെട്ടു.
രോഗപ്രതിരോധ ശേഷി വര്ദ്ധിപ്പിക്കാനും സമഗ്രമായ ആരോഗ്യ പരിപാലനത്തിനും ആയുഷ് വിഭാഗങ്ങളെ പ്രയോജനപ്പെടുത്തണമെങ്കില് പ്രത്യേക മന്ത്രാലയം അനിവാര്യമാണെന്ന് യോഗം വിലയിരുത്തി. ആയുര്വേദം ഉള്പ്പെടെയുള്ള ആയുഷ് ചികിത്സാ വിഭാഗങ്ങളുടെ പൂര്ണ വികാസത്തിന് ഇത് ഉപകരിക്കുകയും അതുവഴി കേരളത്തിലെ മെഡിക്കല് ടൂറിസത്തിന് വന് സാധ്യതകള് തെളിയുകയും ചെയ്യും.
ക്ലിനിക്കല് എസ്റ്റാബ്ലിഷ്മെന്റ് ആക്ടില് ചെറുകിട, സ്വകാര്യ ആയുര്വേദ സ്ഥാപനങ്ങളുടെ നിലനില്പ്പിനെ ബാധിക്കുന്ന വ്യവസ്ഥകള് ഭേദഗതി ചെയ്യുക, കേരളത്തില് ആള് ഇന്ത്യ ഇന്സ്റ്റിറ്റ്യൂട്ട് ഓഫ് ആയുര്വേദ, ആയുഷ് യൂണിവേഴ്സിറ്റി എന്നിവ ആരംഭിക്കുക തുടങ്ങിയവയും യോഗം ആവശ്യപ്പെട്ടു.
നേതൃയോഗം ആരോഗ്യഭാരതി സംസ്ഥാന പ്രിസിഡന്റ് ഡോ. ജെ. രാധാകൃഷ്ണന് ഉദ്ഘാടനം ചെയ്തു. വിശ്വ ആയുര്വേദ പരിഷത്ത് സംസ്ഥാന പ്രസിഡന്റ് ഡോ. ടി.ടി കൃഷ്ണകുമാര് അധ്യക്ഷത വഹിച്ച യോഗത്തില് വര്ക്കിങ് പ്രസിഡന്റ് ഡോ. രവികുമാര് കല്യാണിശ്ശേരില് പ്രമേയവും ജനറല് സെക്രട്ടറി ഡോ. ആദര്ശ് സി. രവി റിപ്പോര്ട്ടും അവതരിപ്പിച്ചു. ഡോ. എം. ദിനേശ്കുമാര്, ഡോ. അര്ജുന്ചന്ദ്, ഡോ. ധനേഷ് കണ്ണന്, ഡോ. കെ. ആര്. രാഹുല്, ഡോ. ദിവ്യലക്ഷ്മി, ഡോ. മനോജ്കുമാര് തുടങ്ങിയവര് പ്രസംഗിച്ചു.
