തിരുനവന്തപുരം: ഒരു മലയാളി വൈദികന് ഉള്പ്പെടെ രണ്ട് വൈദികര് കോക്രോച്ച് ജനതാ പാര്ട്ടി ദല്ഹിയിലെ ജന്തര്മന്തറിലെ സമരത്തില് പങ്കെടുക്കാന് വിദ്യാര്ത്ഥികള്ക്കും യുവാക്കള്ക്കും ആഹ്വാനം നല്കിയെന്ന് വിദ്യാഭ്യാസവിചക്ഷണനും ബിജെപി സംസ്ഥാന വൈസ് പ്രസിഡന്റുമായ ഡോ. കെ.എസ്. രാധാകൃഷ്ണന്. ജോര്ജ്ജ് മുത്തോലില്, അംബ്രോസ് പിച്ചായി മുത്തു എന്നീ രണ്ട് ബിഷപ്പുമാരാണ് വിദ്യാര്ത്ഥികളോട് കലാപം ചെയ്യാന് ആഹ്വാനം ചെയ്തതെന്നും ഡോ. കെ.എസ്.രാധാകൃഷ്ണന് ആരോപിച്ചു.
ഇതില് മലയാളി വൈദികനായ ജോര്ജ്ജ് മുത്തോലില് ഒരു ജെസ്യൂട്ട് പാതിരിയാണ്. തിരുവനന്തപുരം ലൊയോള കോളെജ് പ്രിന്സിപ്പലായിരുന്നു.അയാള് പൂന സര്വ്വകലാശാലയില് നിന്നും ബിരുദവും പിഎച്ച് ഡിയും നേടിയത്. അദ്ദേഹം ജെസ്യൂട്ട് സഭയുടെ സൗത്ത് ഈസ്റ്റ് ഏഷ്യ മേധാവിയാണ്. അദ്ദേഹം നേരിട്ട് റിപ്പോര്ട്ട് ചെയ്യുന്നത് റോമിലുള്ള സുപ്പീരിയര് ജനറലിനാണ്. ഇത് ക്രിയേറ്റീവ് ആയ സമരമാണ്. എല്ലാ ക്രൈസ്തവ യുവാക്കളും ഈ സമരത്തില് പങ്കെടുക്കണമെന്ന് ജോര്ജ്ജ് മുത്തേലില് ആഹ്വാനം ചെയ്തിരുന്നു.
രണ്ടാമത്തെയാളായ അംബ്രോസ് പിച്ചായി മുത്തു വെല്ലൂര് രൂപതയില് നിന്നുള്ള ബിഷപ്പാണ്. തമിഴ്നാട്ടിലെ കാഞ്ചീപുരത്തിലാണ് ഇയാളുടെ ജനനം. റോമിലെ പോണ്ടിഫിക്കല് യൂണിവേഴ്സിറ്റിയില് നിന്നും ഡോക്ടറേറ്റ് നേടിയ ആളാണ്. എല്ലാ ക്രൈസ്തവ ദേവാലയങ്ങളിലും സിജെപി സമരത്തില് ക്രൈസ്തവ യുവാക്കള് പങ്കെടുക്കണമെന്ന് അംബ്രോസ് പിച്ചായി മുത്തു ആഹ്വാനം ചെയ്തിരുന്നുവെന്നും ഡോ. കെ.എസ്. രാധാകൃഷ്ണന് പറഞ്ഞു.
പഹല്ഗാമില് മതം ചോദിച്ച് പാക് ഭീകരര് ഇന്ത്യക്കാരെ വെടിവെച്ച് കൊന്നപ്പോള് ജോര്ജ്ജ് മുത്തേലിലും അംബ്രോസ് പിച്ചായി മുത്തുവും പ്രതികരിച്ചിട്ടില്ല. ഇപ്പോള് ഈ പാറ്റ സമരത്തിന് അനുകൂലമായി സമരം ചെയ്യാന് ഇവര് അഹ്വാനം ചെയ്തത് എന്തുകൊണ്ടായിരിക്കും?- ഡോ. കെ.എസ്. രാധാകൃഷ്ണന് ചോദിക്കുന്നു.
അപ്പോള് എന്തായാരിക്കാം ഇവരുടെ ഈ താല്പര്യം? ഇതിന് പിന്നില് അമേരിക്കയും ചൈനയുമുണ്ട്. അതുപോലെ ഇന്ത്യയെ ഇസ്ലാമിക രാജ്യമാക്കി മാറ്റാന് ആഗ്രഹിക്കുന്ന ഇസ്ലാമിക തീവ്രവാദ ശക്തികളുമുണ്ട്. അമേരിക്കയില് നിന്നും പണം വാങ്ങി ഇന്ത്യയില് മതപരിവര്ത്തനം നടത്തുന്ന ഇവാഞ്ചലിക്കല് ഗ്രൂപ്പുകള്ക്കും മോദിയെ മറച്ചിടാന് താല്പര്യമുണ്ട്. മൂന്നാമത് ഇതിന് പിന്നില് മാവോയിസ്റ്റ് ശക്തികളുമുണ്ട്. ഇവരെല്ലാം ഇന്ത്യയ്ക്കെതിരായവരാണ്. – ഡോ. കെ.എസ്. രാധാകൃഷ്ണന് പറഞ്ഞു.
കഴിഞ്ഞ 12 വര്ഷം മോദി ഇന്ത്യ ഭരിച്ചില്ലായിരുന്നെങ്കില് ഇന്ത്യ എന്ന രാജ്യം തന്നെ ഇപ്പോള് ഉണ്ടാകുമായിരുന്നില്ല. കാരണം സോണിയ ഗാന്ധിയൊക്കെ ഇറ്റാലിയന് പൗരയാണ്. ഇപ്പോഴും അവര്ക്ക് ഇറ്റാലിയന് പൗരത്വമുണ്ട്. അവര്ക്ക് ഇന്ത്യയോട് എന്ത് പ്രതിബദ്ധതയാണുള്ളത്? ഏത് സമയത്തും ഇറ്റലിയിലേക്ക് പോയാല് അവര്ക്ക് ഇറ്റാലിയന് പൗരത്വം ലഭിക്കും. – ഡോ. കെ.എസ്. രാധാകൃഷ്ണന് ചോദിക്കുന്നു.
ഈ പാറ്റ സമരത്തില് പങ്കെടുത്തവര്ക്ക് നല്കിയ ഭക്ഷണത്തിനും താമസത്തിനും ഉള്ള പണം എവിടെ നിന്നു വന്നു? ഒരു പതിനായിരം പേരെങ്കിലും സമരത്തില് പങ്കെടുത്തിട്ടുണ്ട്. ഇവര്ക്കുള്ള ചെലവ് തന്നെ ലക്ഷങ്ങള് വരില്ലേ? ഇത് ആര് നല്കി? അഭിജിത് ദീപ്കെയ്ക്ക് ജോലിയും പണിയുമൊന്നുമില്ല. അപ്പോള് ആ പണം ആരായിരിക്കും നല്കിയത്?- ഡോ. കെ.എസ്. രാധാകൃഷ്ണന് ചോദിക്കുന്നു.
