കൊച്ചി: പ്രതിപക്ഷ നേതാവ് പിണറായി വിജയന്റെ തിരുവനന്തപുരം ബേക്കറി ജംഗ്ഷനിലെ വാടക വീട്ടില് പരിശോധന നടത്തിയ ഇഡി ഉദ്യോഗസ്ഥരെ ആക്രമിച്ച കേസില് പ്രതികളുടെ ജാമ്യ ഹര്ജി തിങ്കളാഴ്ച ഹൈക്കോടതി പരിഗണിക്കും.ഏഴ് പ്രതികളുടെ ജാമ്യ ഹര്ജി ആണ് പരിഗണിക്കുന്നത്.ജാമ്യ ഹര്ജിയെ എതിര്ത്ത് ഇഡിയും ഹര്ജി നല്കി. അന്വേഷണത്തെ തടസപ്പെടുത്താനുള്ള ആക്രമണമാണ് നടന്നത്. ആക്രമണത്തിന് പിന്നില് ഗൂഢാലോചനയുണ്ടെന്നും ഉദ്യോഗസ്ഥരെ ഭയപ്പെടുത്തി പിന്തിരിപ്പിക്കാനായിരുന്നു ശ്രമമെന്നും ഹര്ജിയില് പറയുന്നു.
പ്രകോപനത്താലുളള ആക്രമണമല്ല പിണറായി വിജയന്റെ വീടിന് മുന്നില് നടന്നതെന്ന് ഇഡി ഹര്ജിയില് വാദിക്കുന്നു.പരിശോധന കഴിഞ്ഞ് മടങ്ങുമ്പോള് നടന്ന ആക്രമണം സമയമെടുത്ത് ആലോചിച്ച ശേഷമാണ് നടന്നത്. ഉദ്യോഗസ്ഥരെ ആക്രമിക്കുന്നത് ലഘുവായി കാണരുത്. കേസില് ആകെ ഉണ്ടായിരുന്ന 25 പ്രതികളില് ഒരാള്ക്ക് മാത്രമാണ് ജാമ്യം കിട്ടിയത്.ബാക്കി 24 പേരും 68 ദിവസമായി ജയിലാണ്.
മേയ് 27നാണ് പ്രതിപക്ഷ നേതാവ് പിണറായി വിജയന്റെ തിരുവനന്തപുരത്തെ വീട്ടില് റെയ്ഡിനെത്തിയ ഇഡി ഉദ്യോഗസ്ഥരെ സിപിഎം പ്രവര്ത്തകര് ആക്രമിച്ചത്. പ്രതികളുടെ ജാമ്യപേക്ഷ തിരുവനന്തപുരത്തെ കോടതികള് തള്ളിയത്തോടെയാണ് ഹൈക്കോടതിയിലെത്തിയത്. ഒന്പതാം പ്രതി ഹരീഷ് കുമാറിന് മാത്രമാണ് ജാമ്യം ലഭിച്ചത്. ഇയാളുടെ ജാമ്യം റദ്ദാക്കണമെന്ന് ആവശ്യപ്പെട്ട് സര്ക്കാര് നല്കിയ അപ്പീല് ഹൈകോടതിയുടെ പരിഗണനയിലാണ്.
