ന്യൂദല്ഹി: പാറ്റ സമരത്തിന് പിന്നാലെ തെറ്റിദ്ധരിപ്പിക്കുന്ന ഉള്ളടക്കം സമൂഹമാധ്യമങ്ങളിലൂടെ പ്രചരിപ്പിച്ച പ്രമുഖ യൂട്യൂബര്മാര്ക്കും സോഷ്യല് മീഡിയ ഇന്ഫ്ലുവന്സര്മാര്ക്കുമെതിരെ നടപടിക്കൊരുങ്ങി ദല്ഹി പൊലീസ്.
പോലീസിന്റെ സ്പെഷല് സെല്ലാണ് അന്വേഷണം നടത്തുന്നത്. ഡിജിറ്റല് മാര്ക്കറ്റിങ്, സോഷ്യല് മീഡിയ മാനേജ്മെന്റ്, കണ്ടന്റ് പ്രമോഷന് എന്നീ മേഖലകളില് പ്രവര്ത്തിക്കുന്ന മൂന്ന് സ്വകാര്യ കമ്പനികളുടെ രേഖകളും പോലീസ് പരിശോധിച്ചുവരികയാണ്. പ്രതിഷേധവുമായി ബന്ധപ്പെട്ട് സമൂഹമാധ്യമങ്ങളിലൂടെ പ്രചരിച്ച വീഡിയോകള്, ലൈവ് സ്ട്രീമുകള്, പോസ്റ്റുകള് എന്നിവ ഡിജിറ്റല് തെളിവുകളുടെ അടിസ്ഥാനത്തില് വിശദമായി പരിശോധിക്കുന്നതായി അധികൃതര് അറിയിച്ചു.
അക്രമത്തിന് ആളുകളെ പ്രേരിപ്പിക്കല്, അഭ്യൂഹങ്ങള് പ്രചരിപ്പിക്കല്, തെറ്റായ വിവരങ്ങള് പങ്കുവെക്കല് തുടങ്ങിയ ആരോപണങ്ങളുമായി ബന്ധപ്പെട്ടാണ് അന്വേഷണം പുരോഗമിക്കുന്നത്. ഇതിനകം ഏകദേശം 180 സോഷ്യല് മീഡിയ അക്കൗണ്ടുകള് അന്വേഷണ പരിധിയില് കൊണ്ടുവന്നിട്ടുണ്ടെന്ന് പോലീസ് അറിയിച്ചു.
അതേസമയം സിജെപി പ്രതിഷേധവുമായി ബന്ധപ്പെട്ട് രജിസ്റ്റര് ചെയ്ത കേസുകളില് നിരപരാധികളായ വിദ്യാര്ത്ഥികള്ക്കെതിരെ നടപടികളുണ്ടാകില്ലെന്ന് ദല്ഹി സര്ക്കാര് നേരത്തെ വ്യക്തമാക്കിയിരുന്നു. എന്നാല് ക്രിമിനല് പശ്ചാത്തലമുള്ളവര്ക്കും പ്രതിഷേധത്തിനിടെ അക്രമത്തിലും പൊതുമുതല് നശിപ്പിക്കലിലും പങ്കെടുത്തവര്ക്കും ഈ ഇളവ് ബാധകമാകില്ലെന്ന് ദല്ഹി ആഭ്യന്തരമന്ത്രി ആശിഷ് സൂദ് അറിയിച്ചു.
