ന്യൂദല്ഹി: പാര്ലമെന്റ് പരിസരത്ത് കോണ്ഗ്രസിന്റെയും സമാജ്വാദി പാര്ട്ടിയുടെയും നേതൃത്വത്തില് പ്രതിപക്ഷ എംപിമാര് നടത്തിയ പ്രതീകാത്മക നാടകത്തില് വിഎച്ച്പി അന്താരാഷ്ട്ര ജോയിന്റ് ജനറല് സെക്രട്ടറി സുരേന്ദ്ര ജെയിന് അപലപിച്ചു. എംപിമാര്ക്കെതിരെ കര്ശന നടപടിയെടുക്കണമെന്ന് അദ്ദേഹം ലോക്സഭാ സ്പീക്കറോട് അഭ്യര്ത്ഥിച്ചു. എംപിമാര്ക്കെതിരെ നിയമനടപടി സ്വീകരിക്കുന്ന കാര്യം പരിഗണിക്കുമെന്നും അദ്ദേഹം പ്രതികരിച്ചു.
ഹിന്ദു വിശ്വാസത്തെ ഈ രീതിയില് അപമാനിക്കാന് ആരും ധൈര്യപ്പെടാതിരിക്കാന് അവര്ക്കെതിരെ സാധ്യമായ ഏറ്റവും കര്ശന നടപടി സ്വീകരിക്കണമെന്ന് സുരേന്ദ്ര ജെയിന് സ്പീക്കറോട് ആവശ്യപ്പെട്ടു. പ്രതിപക്ഷ നടപടി ഹിന്ദുവികാരത്തെ വ്രണപ്പെടുത്തി, സംന്യാസി സമൂഹത്തെ അപമാനിച്ചെന്നും അദ്ദേഹം ആരോപിച്ചു. ഒരു സംന്യാസിയുടെ വസ്ത്രം ധരിച്ചുകൊണ്ട് അവര് സംന്യാസിമാരെ അപമാനിക്കുക മാത്രമല്ല, ഹിന്ദു വികാരത്തെ വ്രണപ്പെടുത്തുകയും ചെയ്തു. രാജ്യത്തെ ജനങ്ങള് അവരോട് ക്ഷമിക്കില്ലെന്ന് അദ്ദേഹം പറഞ്ഞു. രാവണന് സീതയെ തട്ടിക്കൊണ്ടുപോകാന് ഒരു സംന്യാസിയുടെ വേഷം ധരിച്ചതുപോലെ, പ്രതിപക്ഷം ഒരു സംന്യാസിയുടെ വേഷം ധരിച്ച് ഹിന്ദുവിശ്വാസത്തെ തട്ടിക്കൊണ്ടുപോകാന് ശ്രമിക്കുകയാണോയെന്നും അദ്ദേഹം ചോദിച്ചു. മറ്റേതെങ്കിലും മതപുരോഹിതന്മാരുടെ വേഷം ധരിച്ച് ആ മതങ്ങളെ പരിഹസിക്കാന് പ്രതിപക്ഷം തയ്യാറാകുമോ. അവര്ക്ക് ഹിന്ദുവിശ്വാസങ്ങളെ മാത്രമേ ലക്ഷ്യം വയ്ക്കാന് കഴിയൂ എന്നും അദ്ദേഹം കൂട്ടിച്ചേര്ത്തു.
