ആലപ്പുഴ: അഗതി മന്ദിരത്തില്‍ ലൈംഗിക അതിക്രമം നടത്തിയെന്ന ജീവനക്കാരിയുടെ പരാതിയില്‍ ഉടമ അറസ്റ്റില്‍. പുന്നപ്ര ശാന്തി ഭവന്‍ ഉടമ ബ്രദര്‍ മാത്യു ആല്‍ബിനെ പുന്നപ്ര പൊലീസാണ് അറസ്റ്റ് ചെയ്തത്.
പരാതിപ്പെട്ട അഗതി മന്ദിരം ജീവനക്കാരിയെ ബ്രദര്‍ മാത്യു ആല്‍ബിന്‍ ഭീഷണിപ്പെടുത്തുന്ന ഫോണ്‍ സംഭാഷണം നേരത്തെ പുറത്ത് വന്നിരുന്നു. ഇത്ര വലിയ പെണ്ണുകേസ് ഉണ്ടായിട്ടും തന്നെ തേടി ആരും വന്നില്ലെന്നും ചെന്നിത്തലയെ നേരില്‍ കണ്ടെന്നുമാണ് പരാതി ഉന്നയിച്ച ജീവനക്കാരിയെ ഫോണില്‍ വിളിച്ച് മാത്യു ആല്‍ബിന്‍ അവകാശപ്പെട്ടത്.അഞ്ച് പേരെ കൊല്ലാനുണ്ടെന്നും ശാന്തി ഭവനില്‍ മാനേജര്‍ ആയിരുന്ന ശരത്തിനെ ആദ്യം കൊലപ്പെടുത്തുമെന്നും സംഭാഷണത്തില്‍ മാത്യൂ ആല്‍ബിന്‍ ഭീഷണിപ്പെടുത്തുന്നുണ്ട്. ജാമ്യം കിട്ടിയ ശേഷം പരാതിക്കാരിയെ സമൂഹ മാധ്യമങ്ങളിലൂടെ അധിക്ഷേപിക്കുമെന്നും ഭീഷണി മുഴക്കി.
പണമടക്കം വാഗ്ദാനം ചെയ്ത് ലൈംഗിക ബന്ധത്തിന് നിര്‍ബന്ധിച്ചെന്നാണ് ബ്രദര്‍ മാത്യു ആല്‍ബിനെതിരെ അഗതി മന്ദിരത്തിലെ ജീവനക്കാരിയുടെ പരാതി.മുമ്പ് കൊലപാതക കേസില്‍ ജയില്‍ ശിക്ഷ അനുഭവിച്ചയാളാണ് മാത്യു ആല്‍ബിന്‍. ജയിലില്‍ നിന്ന് പുറത്തിറങ്ങിയ ശേഷമാണ് മാനസാന്തരം വന്നെന്ന് പറഞ്ഞ് പുന്നപ്രയില്‍ അഗതി മന്ദിരം തുടങ്ങിയത്.
