തിരുവനന്തപുരം: ഒരു ജില്ലാകമ്മിറ്റിയുടെ നേതാവാകാന് പോലും കഴിയാതെ തഴയപ്പെട്ട് ആര്യാ രാജേന്ദ്രന്. മുന് മേയര് പദവിയിലിരുന്ന ഒരാളെ തിരുവനന്തപുരം ജില്ലാസെക്രട്ടറിയാക്കാന് പോലും കഴിയില്ലെന്ന് തീരുമാനിക്കുകയായിരുന്നു ഡിവൈഎഫ് ഐ. ഡിവൈഎഫ്ഐയുടെ തിരുവനന്തപുരം ജില്ലാ പ്രസിഡന്റ് പദവിയിലേക്ക് മുൻ മേയർ ആര്യ രാജേന്ദ്രനെ കൊണ്ടുവരാനുള്ള സി.പി.എം, ഡിവൈഎഫ്ഐ സംസ്ഥാന നേതാക്കളുടെ നീക്കം അമ്പേ പരാജയപ്പെട്ടു.
കാട്ടായിക്കോണം സ്വദേശിയും സംഘടനയുടെ മുൻ ട്രഷററുമായ വി.എസ്. ശ്യാമയെ പുതിയ ജില്ലാ പ്രസിഡന്റായി തിരുവനന്തപുരം ജില്ലാ സമ്മേളനം തിരഞ്ഞെടുത്തു. സംഘടനയുടെ സംസ്ഥാന സെക്രട്ടേറിയറ്റ് അംഗമാണ് നിലവില് ആര്യ രാജേന്ദ്രൻ. വരാനിരിക്കുന്ന നിയമസഭാ തിരഞ്ഞെടുപ്പില് മത്സരിക്കുന്നതില് നിന്ന് പാർട്ടി മാറ്റിനിർത്തിയേക്കുമെന്ന സൂചനകള്ക്കിടയിലാണ് ആര്യയെ ജില്ലാ പ്രസിഡന്റാക്കാൻ ചില ഉന്നത നേതാക്കള് ശ്രമം നടത്തിയത്. എന്നാല്,അംഗങ്ങളുടെ എതിര്പ്പിനെ തുടര്ന്ന് ഇത് വിജയിച്ചില്ല.
