ഹരാരെ: സിംബാബ്വെയ്ക്കെതിരായ ട്വന്റി20 ക്രിക്കറ്റ് പരമ്പര ഭാരതം സ്വന്തമാക്കി. തുടര്ച്ചയായ രണ്ടാം മത്സരത്തിലും ആധികാരിക ജയം നേടി പരമ്പരയില് 2-0ന് മുന്നിലെത്തി. മൂന്ന് മത്സര പരമ്പരയിലെ അവസാന കളി ഇന്ന് വൈകീട്ട് 4.30ന് നടക്കും.
നിര്ണായകമായ രണ്ടാം മത്സരത്തില് ആദ്യം ബാറ്റ് ചെയ്ത ഭാരതം അഞ്ച് വിക്കറ്റ് നഷ്ടത്തില് 219 റണ്സെടുത്തു. സിംബാബ്വെയുടെ മറുപടി 17.5 ഓവറില് 129 റണ്സില് അവസാനിച്ചു.
വിക്കറ്റ് കീപ്പര് ബാറ്റര് ഇഷാന് കിഷന്റെ പ്രകടനമാണ് ഭാരത വിജയത്തില് നിര്ണായകമായത്. പാര്ട്ട് ടൈം ബൗളറായ അഭിഷേക് ശര്മ മൂന്ന് വിക്കറ്റ് പ്രകടനവുമായി മുന്നില് നിന്ന് നയിച്ച ഭാരതത്തിന്റെ ബൗളിങ് ഡിപ്പാര്ട്ട്മെന്റും വിജയത്തില് പ്രധാന പങ്ക് വഹിച്ചു.
ആദ്യം ബാറ്റ് ചെയ്ത ഭാരതം 220 റണ്സ് ആണ് ആതിഥേര്ക്ക് മുന്നില് വച്ചത്. ഇതിനെതിരെ സിംബാബ്വെ തുടക്കത്തിലെ മികച്ച റണ്നിരക്ക് കാക്കുന്ന പ്രകടനം കാഴ്ച്ചവച്ചതൊഴിച്ച് മറ്റൊരു അവസരത്തിലും ഭാരതത്തിന് വെല്ലുവിളിയാകാന് സിംബാബ്വെയ്ക്ക് സാധിച്ചില്ല. പാര്ട്ട് ടൈം ബൗളര് ആയി പന്തെറിഞ്ഞ അഭിഷേക് ശര്മ 2.5 ഓവറില് മൂന്ന് വിക്കറ്റുകള് നേടി. ആകെ വഴങ്ങിയത് 17 റണ്സ് മാത്രം. മത്സരത്തിലൂടെ അരങ്ങേറ്റം കുറിച്ച യാഷ് ഠാക്കൂര് രണ്ട് വിക്കറ്റ് നേടി. പ്രിന്സ് യാദവും രണ്ട് വിക്കറ്റ് നേടിയ മത്സരത്തില് രവി ബിഷ്നോയ്, ശിവം ദുബെ, തിലക് വര്മ എന്നിവരും വിക്കറ്റുകള് നേടി. സിംബാബ്വെയ്ക്കായി ബാറ്റര്മാരില് നിന്ന് ഓപ്പണര് ബ്രയാന് ബെന്നെറ്റ്(32), റയാന് ബേള്(20), ടഡിവനാഷെ മറുമാനി(24) എന്നിവരുടെ ഭാഗത്തുനിന്നുള്ള ശരാശരി പ്രകടനമൊഴിച്ചാല് കാര്യമായ വെല്ലുവിളികളൊന്നും ഉണ്ടായില്ല.
നേരത്തെ ടോസ് നഷ്ടപ്പെട്ട് ആദ്യം ബാറ്റ് ചെയ്ത ഭാരതം ഇഷാന് കിഷന്റെ(81)യും തിലക് വര്മയുടെയും(പുറത്താകാതെ 60) അര്ദ്ധ സെഞ്ചുറി കരുത്തിലാണ് വമ്പന് സ്കോര് പടുത്തത്. ഓപ്പണര് വൈഭവ് സൂര്യവംശി(20), ക്യാപ്റ്റന് ശ്രേയസ് അയ്യര്(25), ശിവം ദുബെ(പുറത്താകാതെ ആറ്) എന്നിവരും മികച്ചു നിന്നു. ഇന്ന് വൈകീട്ട് നടക്കുന്ന പരമ്പരയിലെ മൂന്നാമത്തെയും അവസാനത്തെയും മത്സരം കൂടി ജയിച്ചാല് ഭാരതത്തിന് സമ്പൂര്ണ പരമ്പര സ്വന്തമാക്കാം.
