കൊച്ചി : പാർലമെന്റ് കത്തിക്കണമെന്നും തകർക്കണമെന്നും പറഞ്ഞ മലയാളി വ്ലോഗർ മാപ്പ് പറഞ്ഞ് രംഗത്ത് . മുഹമ്മദ് അനസ് എന്നയാളാണ് തനിക്ക് തെറ്റ് പറ്റിപ്പോയെന്ന് പറഞ്ഞ് രംഗത്തെത്തിയത്. രാജ്യത്തിന്റെ വിവിധ ഭാഗങ്ങളിൽ ഇയാൾക്കെതിരെ കേസ് രജിസ്റ്റർ ചെയ്തതിനു പിന്നാലെയാണ് മാപ്പ് അപേക്ഷ . നമ്മൾ കേരളക്കാരല്ലേ തെറ്റ് പറ്റിയാൽ ക്ഷമിച്ചൂടെയെന്നാണ് അനസ് വീഡിയോയിൽ ചോദിക്കുന്നത്. എല്ലാവരും തന്നെ തീവ്രവാദി, സുഡാപ്പി എന്നൊക്കെയാണ് വിളിക്കുന്നതെന്നും അനസ് മാപ്പ് പറഞ്ഞ് ചെയ്ത വീഡിയോയിൽ പറയുന്നു.
‘ ഞാൻ ചെയ്ത വീഡിയോ അഞ്ച് മിനിട്ട് കഴിഞ്ഞപ്പോ തന്നെ ഞാൻ ഡിലീറ്റ് ചെയ്തു. പക്ഷെ അപ്പോഴേയ്ക്കും വീഡിയോ ഡൗൺലൗഡ് ആയിട്ട് റിയാക്ഷൻ വരുന്നു. എന്റെ തെറ്റാണ് . അപ്പോഴത്തെ ആവേശത്തിൽ ചെയ്തു പോയതാണ് . എന്നെങ്കിലും ഞാൻ മതപരമായ വീഡിയോ ചെയ്തിട്ടുണ്ടോ . ഒരുപാട് ആൾക്കാരിപ്പോ ഡൽഹി പൊലീസിനെ വരെ മെൻഷൻ ചെയ്യുന്നു ‘ എന്നും അനസ് പറയുന്നു.
രണ്ട് ദിവസം മുൻപാണ് ഇന്ത്യയിൽ കലാപം നടത്തണമെന്ന് ആവശ്യപ്പെട്ട് അനസ് വീഡിയോ പോസ്റ്റ് ചെയ്തത്. ‘ കഴിഞ്ഞ വർഷം സെപ്റ്റംബറിൽ നേപ്പാളിലെ എത്ര പൊലീസുകാരുടെ തല എറിഞ്ഞ് പൊട്ടിച്ച കൈയ്യാണെന്നറിയോ ഇത് . മുൻ ശ്രീലങ്ക, നേപ്പാൾ, ബംഗ്ലാദേശ് ഇത്തവണ എന്തുകൊണ്ട് ഇന്ത്യ ആയിക്കൂട ‘ എന്നൊക്കെയായിരുന്നു ചോദ്യം .
