കൊച്ചി: സത്യസായി ബാബയുടെ ജന്മശതാബ്ദി ആഘോഷങ്ങളുടെ ഭാഗമായി ശ്രീസത്യസായി സെന്ട്രല് ട്രസ്റ്റിന്റെയും ശ്രീസത്യസായി സേവാ ഓര്ഗനൈസേഷന്സ് കേരളയുടെയും ആഭിമുഖ്യത്തില് നടപ്പിലാക്കുന്ന ശ്രീസത്യസായി ജീവന ഉപാധി പദ്ധതിയുടെ ഉദ്ഘാടനവും ഓട്ടോറിക്ഷ വിതരണവും നടന്നു. കൊച്ചി എളമക്കര ഭാസ്കരീയം കണ്വെന്ഷന് സെന്ററില് സംഘടിപ്പിച്ച പരിപാടിയില് കേരളത്തിലുടനീളമുള്ള തെരഞ്ഞെടുത്ത സ്ത്രീകള് ഉള്പ്പെടെയുള്ള 100 ഗുണഭോക്താക്കള്ക്ക് ഓട്ടോറിക്ഷകള് വിതരണം ചെയ്തു. ജീവകാരുണ്യ പ്രവര്ത്തനങ്ങളുടെ ഭാഗമായി നിരവധി പേര്ക്ക് ഉപജീവനമാര്ഗം ഉറപ്പാക്കുന്നതാണ് പദ്ധതി. മുഖ്യമന്ത്രി വി.ഡി. സതീശന് പദ്ധതി ഉദ്ഘാടനം നിര്വഹിച്ചു. ഇത്തരം സേവന പരിപാടികള്ക്ക് സര്ക്കാരിന്റെ ഭാഗത്ത് നിന്ന് പൂര്ണ പിന്തുണയുമുണ്ടാകുമെന്ന് മുഖ്യമന്ത്രി അറിയിച്ചു.
ശ്രീസത്യസായി സെന്ട്രല് ട്രസ്റ്റ് മാനേജിങ് ട്രസ്റ്റി ആര്.ജെ. രത്നാകര് അധ്യക്ഷത വഹിച്ചു. അര്ഹതയുള്ള വ്യക്തികള്ക്കും കുടുംബങ്ങള്ക്കും സുസ്ഥിര ഉപജീവന അവസരങ്ങള് നല്കുന്നതിനാണ് പദ്ധതി വിഭാവനം ചെയ്തിരിക്കുന്നത്. കേരളത്തില് ഏറ്റെടുത്തുവരുന്ന ജന്മശതാബ്ദി സേവന സംരംഭങ്ങളില് ഈ തുടക്കം ഒരു പ്രധാന നാഴികക്കല്ലായി അടയാളപ്പെടുത്തുമെന്നും അദ്ദേഹം പറഞ്ഞു. ഈ സംരംഭം ഗുണഭോക്താക്കള്ക്ക് സാമ്പത്തിക സ്ഥിരത, ആത്മവിശ്വാസം, സ്വാശ്രയത്വം എന്നിവ കൊണ്ടുവരുമെന്നും അദ്ദേഹം കൂട്ടിച്ചേര്ത്തു.
ശ്രീസത്യസായി സേവാ ഓര്ഗനൈസേഷന്സ് സംസ്ഥാന പ്രസിഡന്റ് വി. ഉണ്ണികൃഷ്ണന് നായര് സ്വാഗതം ആശംസിച്ചു. ജില്ലാ പ്രസിഡന്റ് വി. ബി. മനോജ് നന്ദി പറഞ്ഞു. മുന് സൗത്ത് സോണല് പ്രസിഡന്റ് ശങ്കര് പ്ലാഞ്ചേരി, പ്രൊഫ. ഇ. മുകുന്ദന്, ട്രസ്റ്റ് കണ്വീനര് സതീഷ് നായര്, ഭാരവാഹികള്, ഭക്തര്, സന്നദ്ധ പ്രവര്ത്തകര് എന്നിവര് പങ്കെടുത്തു.
