തിരുവനന്തപുരം: മുഖ്യമന്ത്രിയായിരിക്കെ പിണറായി വിജയനും മന്ത്രിമാരും നടത്തിയ നവകേരള യാത്രയ്‌ക്കിടെ ആലപ്പുഴയില്‍ കരിങ്കൊടി കാട്ടിയ യൂത്ത് കോണ്‍ഗ്രസ് നേതാക്കളെ, ഗണ്‍മാന്‍ അടക്കം സുരക്ഷാ ഉദ്യോഗസ്ഥര്‍ തല്ലിച്ചതച്ച കേസ് അട്ടിമറിക്കാന്‍ ശ്രമം നടത്തിയ എഡി ജി പി അജിത്കുമാറിന് സസ്പന്ഷന്.അജിത്കുമാറിനെതിരെ വകുപ്പ് തല അന്വേഷണവും നടക്കും. കഴിഞ്ഞ ദിവസം പ്രത്യേക അന്വേഷണ സംഘത്തിന്റെ റിപ്പോര്‍ട്ട് ഡി ജി പി ആഭ്യന്തര വകുപ്പിന് കൈമാറിയിരുന്നു.
വ്യാഴാഴ്ച ആഭ്യന്തര മന്ത്രി രമേശ് ചെന്നിത്തല ഈ വിഷയം മുഖ്യമന്ത്രി വി ഡി സതീശനുമായി ചര്‍ച്ച നടത്തി. മുഖ്യമന്ത്രി സസ്പന്ഷന് അംഗീകാരം നല്‍കി. ഉത്തരവ് ഉടന്‍ പുറത്തിറങ്ങും.
പ്രത്യേക അന്വേഷണ സംഘം നല്‍കിയ റിപ്പോര്‍ട്ടില്‍ ഗുരുതര കണ്ടെത്തലുണ്ടെന്നും നടപടി വേണമെന്നും ഡി ജി പി ആഭ്യന്തര വകുപ്പിന് നല്‍കിയ റിപ്പോര്‍ട്ടില്‍ ശുപാര്‍ശ ചെയ്തിരുന്നു. എ ഡി ജി പി അജിത്കുമാറിന്റെ വിശദീരണം തൃപ്തികരമല്ലെന്നും ചൂണ്ടിക്കാട്ടി.
പിണറായിയുടെ സുരക്ഷാ ഉദ്യോസ്ഥരെ കേസില്‍ നിന്ന് ഒഴിവാക്കാന്‍ എ ഡി ജി പിയുടെ നിര്‍ദ്ദേശപ്രകാരം കൂട്ടുനിന്ന മൂന്ന് ഡി വൈ എസ് പിമാര്‍ക്കും രണ്ട് ഗ്രേഡ് എസ് ഐമാര്‍ക്കുമെതിരെ വകുപ്പ് തല നടപടി ഉണ്ടാകും.തോംസണ്‍, സുനില്‍രാജ്, അരുണ്‍ എന്നീ ഡി വൈ എസ്പിമാര്‍ക്കും ഗ്രേഡ് എസ് ഐമാരായ ഗിരീഷ്, ശ്രീകാന്ത് എന്നിവര്‍ക്കുമെതിരെയാണ് വകുപ്പ് തല നടപടി ഉണ്ടാകുക.
