തിരുവനന്തപുരം: അണ് എയ്ഡഡ് സ്കൂള് ജീവനക്കാര്ക്ക് നിയമപ്രകാരം ലഭിക്കേണ്ട ഉപജീവന ബത്ത, ഗ്രാറ്റുവിറ്റി, പ്രൊവിഡന്റ് ഫണ്ട് എന്നിവ നല്കാതിരിക്കുന്നത് നിയമവിരുദ്ധമാണെന്ന് മനുഷ്യാവകാശ കമ്മിഷന് ഉത്തരവിട്ടു. അണ് എയ്ഡഡ് സ്കൂള് ജീവനക്കാര്ക്ക് സേവന വേതന വ്യവസ്ഥകള് നിര്വചിച്ച് സംസ്ഥാന സര്ക്കാര് ഉത്തരവ് ഇറക്കിയിട്ടില്ലെന്ന പൊതുവിദ്യാഭ്യാസ ഡയറക്ടറുടെ റിപ്പോര്ട്ടിന്റെ പശ്ചാത്തലത്തിലാണ് ഉത്തരവ്.
കമുകിന്കോട് ഹയര്സെക്കന്ഡറി സ്കൂളിലെ മലയാളം അദ്ധ്യാപിക സമര്പ്പിച്ച പരാതിയിലാണ് നടപടി. 2023 ജൂലൈ 13ന് ഒരു വ്യാജപരാതിയുടെ അടിസ്ഥാനത്തില് തന്നെ സസ്പെന്ഡ് ചെയ്തെന്നും 2024 ഏപ്രില് 24ന് സര്വീസില് നിന്നും പിരിച്ചുവിട്ടെന്നും പരാതിയില് പറയുന്നു.
സസ്പെന്ഷന് കാലത്ത് ലഭിക്കേണ്ട ഉപജീവനബത്ത ഉള്പ്പെടെ ഒരു ആനുകൂല്യവും ലഭിച്ചില്ലെന്നും പരാതിക്കാരി അറിയിച്ചു. പരാതിക്കാരി ജോലി ചെയ്തിരുന്നത് അണ്എയ്ഡഡ് സ്കൂളിലാണെന്ന കാരണത്താല് അവര് സസ്പെന്ഷനിലായിരുന്ന കാലയളവില് ലഭിക്കേണ്ടിയിരുന്ന ഉപജീവനബത്ത നിഷേധിക്കാനാവില്ലെന്ന് മനുഷ്യാവകാശ കമ്മിഷന് ചെയര്പേഴ്സണ് ജസ്റ്റിസ് അലക്സാണ്ടര് തോമസ് ഉത്തരവില് പറഞ്ഞു.
ഒരു മാസത്തിനുള്ളില് തുക നല്കിയില്ലെങ്കില് ഗ്രാറ്റുവിറ്റി കണ്ട്രോളിങ് അതോറിട്ടിക്ക് പരാതി നല്കണം. സെന്ട്രല് പേയ്മെന്റ് ഓഫ് ഗ്രാറ്റുവിറ്റി ആക്റ്റ് പ്രകാരമുള്ള തുക പരാതിക്കാരിക്ക് ലഭിക്കുന്നതിനുള്ള നടപടികള് സ്വീകരിക്കണം. സസ്പെന്ഷനിലായ കാലം മുതല് ജോലിയില് നിന്ന് നീക്കം ചെയ്ത കാലം വരെ ഉപജീവനബത്ത ലഭിക്കാന് നിയമപരമായ അര്ഹതയുണ്ട്. ഒരു സര്ക്കാര് ഉദ്യോഗസ്ഥനെ നിയോഗിച്ച് അന്വേഷണം നടത്തി ഇക്കാര്യത്തില് തീരുമാനമെടുക്കണമെന്ന് കമ്മിഷന് ജില്ലാ ലേബര് ഓഫീസര്ക്ക് നിര്ദേശം നല്കി.
പരാതിക്കാരി പ്രൊവിഡന്റ് ഫണ്ട് തുകയ്ക്ക് അര്ഹയാണെന്ന് തെളിഞ്ഞാല് സ്കൂള് മാനേജ്മെന്റില് നിന്നും തുക ലഭ്യമാക്കാന് പിഎഫ് കമ്മിഷണര് നടപടിയെടുക്കണമെന്നും ജസ്റ്റിസ് അലക്സാണ്ടര് തോമസ് നിര്ദേശിച്ചു.
