കൊച്ചി : എം.എസ്.സി എല്സ കപ്പലപകടത്തിന്റെ പശ്ചാത്തലത്തില് ഇന്ത്യയില് തുടരുന്ന നാവികരോട് നീതി പൂര്വം പെരുമാറേണ്ടതല്ലേയെന്ന് ഹൈക്കോടതിയുടെ വാക്കാല് പരാമര്ശം. അന്വേഷണത്തിനായി വ്യക്തമായ മറ്റ് കാരണമില്ലാതെ നാവികരെ തടഞ്ഞു വയ്ക്കേണ്ടതുണ്ടോയെന്നും കോടതി ചോദിച്ചു.അന്വേഷണം പൂര്ത്തിയായെങ്കില് ചില നാവികരെയെങ്കിലും വിട്ടയയ്ക്കണം. ഓണ്ലൈനായി ഹാജരാകാന് ആവശ്യപ്പെടാമെന്നും ഹൈക്കോടതി പറഞ്ഞു.
അന്താരാഷ്ട്ര ഉടമ്പടികള് പാലിക്കേണ്ട ബാധ്യത രാജ്യത്തിനുണ്ടെന്ന് ഹൈക്കോടതി ചൂണ്ടിക്കാട്ടി.വിട്ടയയ്ക്കാനാവശ്യപ്പെട്ട് നാല് നാവികര് നല്കിയ ഹര്ജി പരിഗണിക്കുകയായിരുന്നു കോടതി.ഹര്ജി ഹൈക്കോടതി ജൂലായ് 28ലേക്ക് മാറ്റി.
കേസില് മൂന്ന് നാവികര്ക്ക് നാട്ടിലേക്ക് മടങ്ങാന് ഹൈക്കോടതി നേരത്തെ അനുമതി നല്കിയിരുന്നു. പത്ത് ലക്ഷം രൂപയുടെ ബോണ്ട് അടക്കം കര്ശന വ്യവസ്ഥകളോടെ ആണ് ഇത്.അന്വേഷണത്തോട് സഹകരിക്കണമെന്നും ആവശ്യപ്പെടുമ്പോള് എത്തണമെന്നും നിര്ദേശിച്ചിട്ടുണ്ട്.
കഴിഞ്ഞ മേയ് മാസമാണ് കൊച്ചി പുറംകടലില്, 600 ഓളം കണ്ടെയ്നറുകള് വഹിച്ച എംഎസ് സി എല്സ-3 കപ്പല് മറിഞ്ഞത്. രാസമാലിന്യങ്ങള് അടങ്ങിയ കണ്ടെയ്നറുകള് കടലില് ഒഴുകി പലയിടങ്ങളിലായി അടിഞ്ഞു.
