ഉദയ്‌പൂര്‍(രാജസ്ഥാന്‍): നാടോടി സമൂഹം നാടിന്റെ രക്ഷകരാകേണ്ടവരാണെന്ന് വിഖ്യാത ചിത്രകാരനായ ഡോ. പുഷ്‌കര്‍ ലോഹര്‍. അരക്ഷിത സമൂഹമാണ് നാടോടികളെന്ന ധാരണ തിരുത്തണം. സ്വയംതൊഴിലിന്റെയും കരകൗശലമേഖലയുടെയും രംഗത്ത് വലിയ സംഭാവനകള്‍ നല്കാന്‍ നാടോടി സമൂഹത്തിന് കഴിയുമെന്ന് അദ്ദേഹം പറഞ്ഞു. മഹാറാണ പ്രതാപ് കാര്‍ഷിക സാങ്കേതിക സര്‍വകലാശാലയിലെ സിടിഎഇ കോളജ് ഓഡിറ്റോറിയത്തില്‍ നടന്ന നാടോടി യുവ സമ്മേളനത്തില്‍ സംസാരിക്കുകയായിരുന്നു അദ്ദേഹം.
നാടോടി യുവാക്കള്‍ക്ക് പുതിയ ദിശയും ആത്മവിശ്വാസവും പകരുന്നതിനായാണ് സമ്മേളനം സംഘടിപ്പിച്ചതെന്ന് അദ്ദേഹം ചൂണ്ടിക്കാട്ടി.
ഗ്രാമവികസന മന്ത്രാലയത്തിന്റെ കീഴില്‍ പ്രവര്‍ത്തിക്കുന്ന ആര്‍എസ്ഇടിഐ മാനേജര്‍ കൗശലേന്ദ്ര സിങ് സംരംഭകരാകാനുള്ള മാര്‍ഗദര്‍ശനം നല്കി. ആര്‍എസ്ഇടിഐ തൊഴില്‍രഹിതര്‍ക്ക് സൗജന്യ നൈപുണ്യ പരിശീലനം നല്‍കുന്നുണ്ട്. ടൂള്‍കിറ്റും കേന്ദ്രസര്‍ക്കാരിന്റെ സര്‍ട്ടിഫിക്കറ്റും നല്കാനുള്ള പദ്ധതി അദ്ദേഹം വിശദീകരിച്ചു. യുവാക്കള്‍ പാരമ്പര്യവും കഴിവും മനസിലാക്കി ഉയരണമെന്ന് പരിപാടിയുടെ സംയോജകന്‍ ദീപക് ശുക്ല ചൂണ്ടിക്കാട്ടി. ഏതൊരു സമൂഹത്തിന്റെയും ഏറ്റവും വലിയ ശക്തി തനിമയില്‍ ആത്മവിശ്വാസമുള്ള യുവാക്കളാണ്. പൂര്‍വ്വികപാരമ്പര്യങ്ങളില്‍ നിന്നും പോരാട്ടങ്ങളില്‍ നിന്നും പ്രചോദനം ഉള്‍ക്കൊണ്ട് സമൂഹം കെട്ടിപ്പടുക്കുന്നതില്‍ സജീവമായ പങ്ക് വഹിക്കാന്‍ അദ്ദേഹം യുവാക്കളോട് അഭ്യര്‍ത്ഥിച്ചു.
ആസക്തികളില്‍ നിന്ന് മുക്തരാകണം. മദ്യം, പുകയില, മറ്റ് മയക്കുമരുന്നുകള്‍ തുടങ്ങിയവ വ്യക്തികളെയും കുടുംബങ്ങളെയും ദുര്‍ബലപ്പെടുത്തും. മൊബൈല്‍ ഫോണുകളോടും സോഷ്യല്‍ മീഡിയയോടുമുള്ള അനിയന്ത്രിതമായ ആസക്തി ഏകാഗ്രതയെയും സമയത്തെയും ഭാവിയെയും ബാധിക്കുന്നു. ഈ ആസക്തികളില്‍ നിന്നും യുവാക്കള്‍ സ്വയം മോചിതരായാല്‍ ജീവിതത്തില്‍ പുതിയ ഉയരങ്ങള്‍ കൈവരിക്കാന്‍ കഴിയുമെന്ന് ദീപക് ശുക്ല പറഞ്ഞു.
