ന്യൂദല്ഹി: പാര്ലമെന്റിന്റെ വര്ഷകാലസമ്മേളനത്തിന് ഇന്ന് തുടക്കം. പത്തൊമ്പതു ദിവസത്തെ സമ്മേളനം ആഗസ്ത് 13ന് സമാപിക്കും. സുപ്രധാനമായ ചര്ച്ചകള്ക്കും നിരവധി നിയമനിര്മ്മാണങ്ങള്ക്കും സമ്മേളനം വേദിയാകും. കഴിഞ്ഞ ദിവസം ചേര്ന്ന എന്ഡിഎ നേതൃയോഗം സഭയില് സ്വീകരിക്കേണ്ട തന്ത്രങ്ങള്ക്ക് അന്തിമ രൂപം നല്കിയിരുന്നു. സമ്മേളനം ആരംഭിക്കുന്നതിന് മുന്നോടിയായി പ്രധാനമന്ത്രി നരേന്ദ്ര മോദി ഇന്ന് രാവിലെ 10.15ന് പാര്ലമെന്റ് മന്ദിരത്തില്വെച്ച് മാധ്യമങ്ങളോട് സംസാരിക്കും.
ദേശീയ ഗീതമായ വന്ദേമാതരം ആലപിക്കുമ്പോള് മനഃപൂര്വം തടസപ്പെടുത്തുകയോ അപമാനിക്കുകയോ ചെയ്യുന്നത് ശിക്ഷാര്ഹമായ കുറ്റമാക്കുന്നതിന് 1971 ലെ നിയമം ഭേദഗതി ചെയ്യാനുള്ള ബില് ഇന്ന് രാജ്യസഭയില് കേന്ദ്ര ആഭ്യന്തരമന്ത്രി അമിത്ഷാ അവതരിപ്പിക്കും.
വിദേശ സംഭാവന നിയന്ത്രണ (എഫ്സിആര്എ) ഭേദഗതി ബില് ഈ സഭാകാലത്ത് അവതരിപ്പിക്കും. രജിസ്ട്രേഷന് വൈകിക്കുന്നതിനണ്ട് കര്ശനമായ വ്യവസ്ഥകള് നിര്ദ്ദേശിക്കുന്ന ജനന-മരണ രജിസ്ട്രേഷന് ഭേദഗതി ബില്, ആദായനികുതി ഭേദഗതി ബില്, സുപ്രീംകോടതി ജഡ്ജിമാരുടെ എണ്ണം ഉയര്ത്തുന്നതിനുള്ള ഭേദഗതി ബില്, മൈക്രോ, ചെറുകിട, ഇടത്തരം സംരംഭ വികസന ഭേദഗതി ബില് എന്നിവയും ഈ സമ്മേളനകാലത്ത് അവതരിപ്പിക്കും. വികസിത ഭാരതം ശിക്ഷാ അധിഷ്ഠാന് ബില്ലുമായി ബന്ധപ്പെട്ട് പാര്ലമെന്റിന്റെ സംയുക്ത സമിതിയുടെ റിപ്പോര്ട്ട് സഭയില്വെക്കും.
നാളെ രാവിലെ ചേരുന്ന എന്ഡിഎ പാര്ലമെന്ററി പാര്ട്ടി യോഗത്തെ പ്രധാനമന്ത്രി നരേന്ദ്ര മോദി അഭിസംബോധന ചെയ്യും. യോഗം മംഗള് മിലന് എന്ന പേരിലാണ് ഇനിമുതല് അറിയപ്പെടുക.
ജന്മഭൂമി ഓണ്ലൈന്