ന്യൂദല്ഹി: കോമണ്വെല്ത്ത് ഗെയിംസില് 2026ന്റെ ഉദ്ഘാടന ചടങ്ങില് ഒളിംപിക്സ് മെഡല് ജേതാക്കളായ മീരാബായി ചാനുവും ലവ്ലിന ബോര്ഗോഹെയ്നും ഭാരതത്തിന്റെ പതാകാവാഹകരാകുമെന്ന് ഇന്ത്യന് ഒളിംപിക്സ് അസോസിയേഷന്(ഐഒഎ) അധ്യക്ഷ പി.ടി. ഉഷ. ഇത്തവണത്തെ കോമണ്വെല്ത്ത് ഗെയിംസിന്റെ ഉദ്ഘാടന ദിവസമായ ഈ മാസം 23നാണ് വര്ണാഭമായ ചടങ്ങ്.
വിവിധ കായിക ഇനങ്ങള് സമന്വയിക്കുന്ന വിപുലമായ കോമണ്വെല്ത്ത് ഗെയിംസ് പോലൊരു മഹാകായികമേളയുടെ ഉദ്ഘാടന ചടങ്ങില് ഭാരതത്തെ രണ്ട് വനിതകള് ചേര്ന്ന് നയിക്കുന്നതിനെ വലിയ അഭിമാനപൂര്വ്വമായ ഒന്നായി കരുതുന്നുവെന്ന് പി.ടി. ഉഷ പറഞ്ഞു. കോമണ്വെല്ത്ത് ഗെയിംസിന്റെ അന്തിമ പരിശീലനങ്ങള്ക്കായി രണ്ട് താരങ്ങളും ഇപ്പോള് യുകെയിലാണ്.
കഴിഞ്ഞ തവണ 2022ലെ ബിര്മിങ്ങാം കോമണ്വെല്ത്ത് ഗെയിംസില് ഭാരോദ്വഹനത്തില് സ്വര്ണം നേടിയ താരമാണ് മീരാബായി ചാനു. 49 കിലോ വിഭാഗത്തിലായിരുന്നു ചാനുവിന്റെ സുവര്ണനേട്ടം. ഇതിന്റെ തലേ വര്ഷം ടോക്കിയോ ഒളിംപിക്സില് മിരാഭായി വെള്ളി നേടിയിരുന്നു. 2024ല് പാരീസ് ഒളിംപിക്സില് മീരാബായിക്ക് മെഡല് നേട്ടം ആവര്ത്തിക്കാനായില്ല. അതിന്റെ ക്ഷീണം കോമണ്വെല്ത്തിലൂടെ മറികടക്കാനുള്ള ഒരുക്കത്തിലാണ് 32കാരിയായ മീരാബായി.
ടോക്കിയോ ഒളിംപിക്സില് വെങ്കല നേട്ടവുമായി തിളങ്ങിയ ലവ്ലിന 2023 ലോക ചാമ്പ്യന്ഷിപ്പില് ലവ്ലിന സ്വര്ണനേട്ടം കൈവരിച്ചു. അതേവര്ഷം നടന്ന ഹ്വാന്ചോ ഏഷ്യന് ഗെയിംസില് താരം വെള്ളിയും സ്വന്തമാക്കി.
