കോട്ടയം: പൊലീസ് ഉദ്യോഗസ്ഥന്റെ ഔദ്യോഗിക കൃത്യനിര്‍വഹണം തടസ്സപ്പെടുത്തുകയും ആക്രമിക്കുകയും ചെയ്‌തെന്ന കേസില്‍ പ്രതികളായ കെന്‍സ് സാബു, തോമസ് എബ്രഹാം എന്നിവരെ കോട്ടയം ജുഡീഷ്യല്‍ ഫസ്റ്റ് ക്ലാസ് മജിസ്‌ട്രേറ്റ് കോടതി കുറ്റവിമുക്തരാക്കി. ഒന്‍പത് വര്‍ഷത്തോളം നീണ്ടുനിന്ന നിയമനടപടികള്‍ക്കൊടുവിലാണ് വിധി.
കേസില്‍ പ്രോസിക്യൂഷന്‍ ഹാജരാക്കിയ സാക്ഷിമൊഴികളും രേഖകളും പരിശോധിച്ച കോടതി, കുറ്റം സംശയാതീതമായി തെളിയിക്കാന്‍ കഴിഞ്ഞിട്ടില്ലെന്ന് കണ്ടെത്തി. സംശയത്തിന്റെ ആനുകൂല്യം നല്‍കി പ്രതികളെ വിട്ടയയ്‌ക്കുകയായിരുന്നു.
ഒന്നാം പ്രതി കെന്‍സ് സാബുവിന് വേണ്ടി അഡ്വ. വിവേക് മാത്യു വര്‍ക്കിയും രണ്ടാം പ്രതി തോമസ് എബ്രഹാമിന് വേണ്ടി അഡ്വ. ജോര്‍ജ് തോമസ് പരയ്‌ക്കനും ഹാജരായി.
