കോട്ടയം: ലോകകപ്പ് ഫുട്ബാള്‍ ഫൈനല്‍ മത്സരം ഉളളതിനാല്‍ തിങ്കളാഴ്ച സംസ്ഥാനത്തെ സ്‌കൂളുകള്‍ക്കും കോളേജുകള്‍ക്കും അവധി നല്‍കണമെന്ന് പാലാ നഗരസഭാ ചെയര്‍പേഴ്‌സണ്‍ ദിയ ബിനു പുളിക്കകണ്ടം. വിദ്യാര്‍ഥികളില്‍ കായികവിനോദങ്ങളോട് താത്പര്യം പ്രോത്സാഹിപ്പിക്കുന്നതിനായി അവധി അനുവദിക്കണമെന്ന് ആവശ്യപ്പെട്ട് വിദ്യാഭ്യാസ മന്ത്രിക്ക് നിവേദനം നല്‍കി.
സ്‌കൂള്‍ മാനേജ്‌മെന്റുകളും ഇതേ മാതൃകയില്‍ വിദ്യാര്‍ഥികള്‍ക്ക് അവധി നല്‍കണമെന്ന് അവര്‍ ആവശ്യമുന്നയിച്ചു. ഞായറാഴ്ച അര്‍ധരാത്രിയിലെ ലോകകപ്പ് ഫൈനല്‍ കാണുന്ന വിദ്യാര്‍ഥികള്‍ പിറ്റേദിവസം ഉറക്കക്കുറവിനാല്‍ ക്ഷീണം അനുഭവിക്കേണ്ട സാഹചര്യം ഒഴിവാക്കണം.
ലഹരി, മയക്കുമരുന്ന്, സാമൂഹ്യ മാധ്യമങ്ങള്‍ എന്നിവയുടെ അമിതോപയോഗത്തില്‍ നിന്ന് വിദ്യാര്‍ഥികളെ രക്ഷിക്കുന്നതിന് കായികപ്രവര്‍ത്തനങ്ങള്‍ക്ക് വലിയ പങ്കുവഹിക്കാനാകുമെന്നും ദിയ പറഞ്ഞു.ശാരീരികക്ഷമത വര്‍ധിപ്പിക്കുന്നതിനും അച്ചടക്കം, മാനസികാരോഗ്യം, കൂട്ടായ്‌മ, നേതൃത്വഗുണം, പ്രതിസന്ധികളെ നേരിടാനുള്ള കഴിവ് എന്നിവ വളര്‍ത്തിയെടുക്കാനും കായികരംഗം കുട്ടികളെ സഹായിക്കുമെന്നും ദിയ പറഞ്ഞു.
