തിരുവനന്തപുരം: കെ എസ് ആര്‍ ടി സിയുടെ സ്ത്രീ സൗജന്യ യാത്രാ പദ്ധതി മൂലം സാമ്പത്തിക പ്രതിസന്ധിയിലായ സ്വകാര്യ ബസുടമകള്‍ പ്രഖ്യാപിച്ച സെക്രട്ടറിയേറ്റ് മാര്‍ച്ചും റിലെ ധര്‍ണയും മാറ്റി വച്ചു. ജൂലൈ 20 മുതല്‍ ജൂലൈ 25 വരെ ഒരാഴ്ച നടത്താനിരുന്ന ബസുടമകളുടെ സെക്രട്ടറിയേറ്റ് മാര്‍ച്ചും റിലെ ധര്‍ണയും മാറ്റി വച്ചതായി ബസ് ഓപറേറ്റേഴ്‌സ് ഫെഡറേഷന്‍ സ്റ്റിയറിംഗ് കമ്മിറ്റിയാണ് അറിയിച്ചത്.
ഗതാഗതമന്ത്രിയുമായി ഔദ്യോഗികമായി നടന്ന ചര്‍ച്ചയില്‍ ബസ് വ്യവസായം നേരിടുന്ന പ്രയാസങ്ങള്‍ പഠിച്ച് സര്‍ക്കാരിന് റിപ്പോര്‍ട്ട് നല്‍കാന്‍ അഞ്ചംഗ സമിതിയെ ചുമതലപ്പെടുത്തിയിട്ടുണ്ട്.ആറ് ആഴ്ചയ്‌ക്കുള്ളില്‍ സമിതിയില്‍ നിന്ന് റിപ്പോര്‍ട്ട് ലഭിക്കുന്ന മുറയ്‌ക്ക് സ്ത്രീ സൗജന്യ യാത്രാ പദ്ധതി മൂലം പ്രയാസത്തിലായ ബസുടമകളെ സഹായിക്കുന്ന തീരുമാനം സര്‍ക്കാരിന്റെ ഭാഗത്ത് നിന്നുണ്ടാവുമെന്ന് ഗതാഗത മന്ത്രി നല്‍കിയ ഉറപ്പ് കണക്കിലെടുത്താണ് പ്രതിഷേധം മാറ്റി വച്ചതെന്ന് ബസ് ഉടമകള്‍ അറിയിച്ചു.
ഗതാഗത മന്ത്രിയുടെ ഉറപ്പ് നിശ്ചയിച്ച കാലാവധിക്കുള്ളില്‍ നടപ്പിലാക്കിയില്ലെങ്കില്‍ സര്‍വിസ് നിര്‍ത്തിവച്ചുള്ള അനിശ്ചിത കാല ബസ് സമരം പ്രഖ്യാപിക്കുമെന്നും അറിയിപ്പുണ്ട്. സ്ത്രീകള്‍ക്ക് സൗജന്യ യാത്ര അനുവദിക്കുന്നതിന് വരുമാന പരിധി നിശ്ചയിക്കണം.ഒരു ദിവസം രണ്ടു യാത്ര മാത്രം അനുവദിക്കുന്ന വിധത്തിലുള്ള കാര്‍ഡ് വിതരണം ചെയ്യണമെന്നും കെ എസ് ആര്‍ ടി സി ക്കും സ്വകാര്യ ബസുടകളെ പോലെ സമയ ക്ലിപ്തത ഉറപ്പ് വരുത്തണമെന്നും ആവശ്യപ്പെട്ടിട്ടുണ്ട്.
