ലണ്ടന്‍: ലോര്ഡ്സിലെ ആദ്യ വനിതാ ടെസ്റ്റ് ക്രിക്കറ്റില്‍ വിജയിച്ച് ഭാരതം ചരിത്രം കുറിച്ചു. ഹര്‍മന്‍പ്രീത് കൗറിനു കീഴിലുള്ള ഭാരത ടീം ആതിഥേയരായ ഇംഗ്ലണ്ടിനെ 270 റണ്‍സിനു തകര്‍ത്തു. സ്‌കോര്‍: ഭാരതം-285, 341/7; ഇംഗ്ലണ്ട്-170, 186
അഞ്ച് വിക്കറ്റ് പ്രകടനവുമായി പേസര്‍ ക്രാന്തി ഗൗഡും രണ്ടാം ഇന്നിങ്‌സില്‍ സെഞ്ചുറി പ്രകടനവുമായി യാസ്തിക ഭാട്ടിയയും (113) ഭാരത വിജയത്തില്‍ നിര്‍ണായക പങ്കു വഹിച്ചു. ടെസ്റ്റിന്റെ നാലാം ദിവസം ഉച്ചഭക്ഷണത്തിനു പിരിയും മുമ്പേ വിജയമുറപ്പാക്കി. മത്സരത്തിന് ഒന്നര ദിവസം കൂടി ശേഷിക്കേയാണ് നേട്ടം. 142 വര്‍ഷത്തെ ചരിത്രമുള്ള ലണ്ടനിലെ ലോര്‍ഡ്‌സ് ക്രിക്കറ്റ് സ്റ്റേഡിയത്തില്‍ അരങ്ങേറിയ ചരിത്രത്തിലെ ആദ്യ വനിതാ ക്രിക്കറ്റ് ടെസ്റ്റാണ് ഇന്നലെ ഭാരത വിജയത്തിലൂടെ അവസാനിച്ചത്. ഭാരത വനിതാ ടീമിന്റെ 11-ാം ടെസ്റ്റ് ജയാഘോഷമാണിത്. ഇംഗ്ലണ്ടിനെതിരായ നാലാമത്തെയും.
