തിരുവനന്തപുരം: കെഎസ്ആര്ടിസി ഓര്ഡിനറി ബസ്സുകളില് സ്ത്രീകള്ക്ക് സര്ക്കാര് സൗജന്യ യാത്ര പ്രഖ്യാപിച്ചതോടെ പ്രകൃതിഭംഗി ആസ്വദിക്കാന് പൊന്മുടിയിലേക്ക് സ്ത്രീ യാത്രക്കാരുടെ വന് തിരക്ക്. എന്നാല്, ആവശ്യത്തിന് സര്വീസുകള് ഇല്ലാത്തതും കല്ലാര് കഴിഞ്ഞുള്ള ഹെയര്പിന് വളവുകളിലെ റോഡിന്റെ വീതിക്കുറവും നിലവിലെ യാത്രയെ അപകടഭീതിയിലാഴ്ത്തുകയാണ്. പരിമിതമായ സൗകര്യങ്ങളില് അമിതഭാരം കയറ്റി ഓടുന്ന ബസ്സുകള് മലയോര പാതയില് അപകടത്തില്പ്പെടുന്നത് പ്രദേശവാസികളെയും വിനോദസഞ്ചാരികളെയും ഒരുപോലെ ആശങ്കയിലാക്കുന്നുണ്ട്.
നിലവില് തിരുവനന്തപുരം, നെയ്യാറ്റിന്കര, നെടുമങ്ങാട്, വിതുര തുടങ്ങിയ കെഎസ്ആര്ടിസി ഡിപ്പോകളില് നിന്ന് നാമമാത്രമായ സര്വ്വീസുകളാണ് പൊന്മുടിയിലേക്ക് യാത്ര നടത്തുന്നത്. പൊന്മുടിയിലെ തോട്ടം തൊഴിലാളികള്ക്കും പ്രദേശവാസികള്ക്കും ടൂറിസ്റ്റുകള്ക്കും ആശ്രയമായിരുന്ന ഈ സര്വീസുകളില്, പ്രിയദര്ശിനി സൗജന്യ യാത്രാ ആനുകൂല്യം വന്നതോടെ ഗ്രാമങ്ങളില് നിന്നുള്ള സ്ത്രീ ജനങ്ങള് കൂട്ടത്തോടെ എത്തിച്ചേരുകയാണ്. ഉള്ക്കൊള്ളാന് കഴിയുന്നതിലും ഇരട്ടിയിലധികം യാത്രക്കാരുമായാണ് ഇപ്പോള് ബസ്സുകള് സര്വീസ് നടത്തുന്നത്. കഴിഞ്ഞ ദിവസം നെയ്യാറ്റിന്കര ഡിപ്പോയിലെ മിനി ബസ്സ് ആറാം ഹെയര്പിന് വളവില് വച്ച് അപകടത്തില്പ്പെട്ടത് ഇതിന് ഉദാഹരണമാണ്. നാല്പ്പതോളം പേര്ക്ക് യാത്ര ചെയ്യാവുന്ന ബസ്സില് എണ്പതിലധികം യാത്രക്കാരുണ്ടായിരുന്നതായും അമിതഭാരം കാരണം ബ്രേക്ക് നഷ്ടപ്പെട്ടതാണ് അപകടത്തിന് കാരണമായതെന്നുമാണ് പ്രാഥമിക വിവരം.
കല്ലാര് പിന്നിട്ടാല് കഠിനമായ 22 ഹെയര്പിന് വളവുകളാണ് പൊന്മുടി യാത്രയിലുള്ളത്. റോഡിന്റെ വീതിക്കുറവ് മൂലം ഈ ഭാഗങ്ങളില് വലിയ വാഹനങ്ങള്ക്കും ബസ്സുകള്ക്കും സുഗമമായി കടന്നുപോകാന് വലിയ ബുദ്ധിമുട്ടാണ് നേരിടുന്നത്. ഭൂമി ഏറ്റെടുത്ത് റോഡ് വീതികൂട്ടണമെന്ന ആവശ്യത്തിന് വര്ഷങ്ങളുടെ പഴക്കമുണ്ടെങ്കിലും അധികൃതരുടെ ഭാഗത്തുനിന്നും അനുകൂലമായ നടപടികള് ഉണ്ടാകുന്നില്ലെന്ന് ആക്ഷേപമുണ്ട്. വാമനപുരം മണ്ഡലത്തില്പ്പെടുന്ന പൊന്മുടിയില് കാലാകാലങ്ങളായി വരുന്ന ജനപ്രതിനിധികള് അപ്പര് സാനിറ്റോറിയത്തില് നടത്തുന്ന നവീകരണ പ്രവര്ത്തനങ്ങള്ക്കപ്പുറം, യാത്രാക്ലേശം പരിഹരിക്കാനോ റോഡ് വികസനത്തിനോ മുന്കൈ എടുക്കുന്നില്ലെന്നാണ് നാട്ടുകാര് പറയുന്നത്.
പൊന്മുടി ഒരു അന്തര്സംസ്ഥാന ടൂറിസ്റ്റ് കേന്ദ്രമായി ഉയരണമെങ്കില് പാതകളുടെ വികസനം അത്യന്താപേക്ഷിതമാണ്. നിലവിലെ വാമനപുരം എംഎല്എ സുധീര് ഷാ പാലോട് പൊന്മുടിയുടെയും അനുബന്ധ റോഡുകളുടെയും വികസനത്തില് കൂടുതല് ശ്രദ്ധ പതിപ്പിക്കണമെന്നാണ് നാട്ടുകാരുടെ പ്രധാന ആവശ്യം. കൂടാതെ, നിലവിലെ അമിത തിരക്ക് പരിഹരിക്കുന്നതിനായി കിളിമാനൂര്, വര്ക്കല, ആറ്റിങ്ങല്, വെഞ്ഞാറമൂട് തുടങ്ങിയ കെഎസ്ആര്ടിസി ഡിപ്പോകളില് നിന്നു കൂടി പൊന്മുടിയിലേക്ക് പുതിയ സര്വീസുകള് ആരംഭിക്കണമെന്ന ആവശ്യവും ശക്തമായിട്ടുണ്ട്. ഇതിനായി ബന്ധപ്പെട്ട അധികാരികളും ജനപ്രതിനിധികളും അടിയന്തരമായി ഇടപെടണമെന്നാണ് യാത്രക്കാര് ആവശ്യപ്പെടുന്നത്.
