ചെന്നൈ : പ്രധാനമന്ത്രി നരേന്ദ്രമോദിയോട് തനിക്ക് ബഹുമാനം ഉണ്ടെന്നും താൻ എന്നും ദേശീയവാദിയായി , ഹിന്ദുവായി തന്നെ തുടരുമെന്നും കെ. അണ്ണാമലൈ . തന്റെ പുതിയ പ്രസ്ഥാനമായ വീ ദി പീപ്പിൾ ഫൗണ്ടേഷന്റെ (ഡബ്ല്യുടിപിഎഫ്) ആദ്യ റാലിയിൽ തമിഴ് ജനതയെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം.
തമിഴ്നാട്ടിലെ കോയമ്പത്തൂർ ജില്ലയിലെ പൊള്ളാച്ചിക്കടുത്തുള്ള അച്ചിപ്പട്ടിയിൽ എത്തിയ വലിയ ജനക്കൂട്ടത്തോട് സംസാരിക്കവേ ജൂൺ 5 ന് ഡബ്ല്യുടിപിഎഫ് പ്രാബല്യത്തിൽ വന്നതിന് ശേഷമുള്ള 38 ദിവസത്തിനുള്ളിൽ, താൻ ഒരിക്കലും ബിജെപിക്കെതിരെ സംസാരിച്ചിട്ടില്ലെന്ന് അദ്ദേഹം ചൂണ്ടിക്കാട്ടി.
‘ ഞാൻ ഒരു ഹിന്ദുവാണ്, പക്ഷേ ഞാൻ വീട്ടിൽ നിന്ന് ഇറങ്ങുമ്പോൾ, എന്റെ ജാതിയും മതവും ഞാൻ അകത്ത് തന്നെ സൂക്ഷിക്കുന്നു. മതം എന്റെ സംഘടനയുടെ പരിധിക്ക് പുറത്താണ്. എന്റെ രാഷ്ട്രീയത്തിന്റെ പ്രാഥമിക ലക്ഷ്യം തമിഴ്നാടിനെ ഒരു മുൻനിര സംസ്ഥാനമാക്കി മാറ്റുക എന്നതാണ് . ഈ കാലയളവിൽ പ്രസ്ഥാനത്തിന് ഏകദേശം 19 ലക്ഷം അനുയായികളെ കിട്ടി . അതിൽ 17 ശതമാനം സ്ത്രീകളാണ്. “ അദ്ദേഹം പറഞ്ഞു.
