തൃശൂര്: ഗുരുവായൂര് ക്ഷേത്രത്തില് ഞായറാഴ്ച ദിവസം വന് ഭക്തജന തിരക്ക്. ഇന്ന് 185 വിവാഹങ്ങളാണ് ക്ഷേത്രസന്നിധിയില് നടന്നത്.
പുലര്ച്ചെ നിര്മ്മാല്യ ദര്ശനത്തിനായി നട തുറന്നത് മുതല് ഭക്തരുടെ നീണ്ട നിരയുണ്ടായിരുന്നു. പുലര്ച്ചെ അഞ്ച് മണി മുതല് നാലു മണ്ഡപങ്ങളിലായാണ് വിവാഹങ്ങള് നടന്നത്. 11 മണി വരെ ക്ഷേത്രത്തിനകത്തും പുറത്തും വണ്വേ സംവിധാനത്തിലൂടെ ഭക്തരെ നിയന്ത്രിച്ചു. ഉച്ച പൂജയ്ക്ക് നടയടക്കും മുമ്പ് 12 മണിയോടെ വിവാഹങ്ങള് പൂര്ത്തിയായി. 721കുട്ടികള്ക്ക് ചോറൂണ് നല്കി. വഴിപാടിനത്തില് മാത്രം 99,03,014 രൂപയാണ് ക്ഷേത്രത്തില് ലഭിച്ചത്.
വരിനില്ക്കാതെ ദര്ശനം നടത്താന് നെയ്വിളക്ക് ശീട്ടാക്കിയ വകയില് 35,55,000 രൂപ ലഭിച്ചു. തിരക്ക് ഉണ്ടായിരുന്നെങ്കിലും ഭക്തര്ക്ക് യാതൊരു തരത്തിലുള്ള ബുദ്ധിമുട്ടും അനുഭവപ്പെട്ടില്ല. ടെമ്പിള് പൊലീസും ദേവസ്വം സെക്യൂരിറ്റി ജീവനക്കാരും ചേര്ന്നാണ് തിരക്ക് നിയന്ത്രിച്ചത്.
