വാഷിംഗ്ട്ടണ്‍ : കൈക്കൂലി കേസില്‍ അദാനിക്കും മറ്റ് ഏഴ് പേര്‍ക്കുമെതിരായ ക്രിമിനല്‍ കുറ്റപത്രം തള്ളണമെന്ന അമേരിക്കന്‍ സര്‍ക്കാരിന്റെ അഭ്യര്‍ത്ഥനയുമായി ബന്ധപ്പെട്ട് ആര്‍ക്കെങ്കിലും എന്തെങ്കിലും വാഗ്ദാനം ചെയ്തിട്ടുണ്ടോ, കൈമാറ്റം ചെയ്തിട്ടുണ്ടോ, സ്വീകരിച്ചിട്ടുണ്ടോ എന്ന് വെളിപ്പെടുത്താന്‍ യു എസ് ഡിസ്ട്രിക്റ്റ് കോടതി ഗൗതം അദാനിക്ക് നിര്‍ദ്ദേശം നല്‍കി.
ജൂലൈ 15-നകം സത്യവാങ്മൂലം നല്‍കണം. കുറ്റപത്രം തള്ളിക്കളയുന്നതുമായി ബന്ധപ്പെട്ട് ആരെങ്കിലും എന്തെങ്കിലും വാഗ്ദാനം ചെയ്തതോ, സ്വീകരിച്ചതോ, സമ്മതിച്ചതോ ആയ കാര്യങ്ങള്‍ അറിയാമോ?, കുറ്റപത്രം തള്ളിക്കളയുന്നതിനായി എന്തെങ്കിലും കരാറുള്ളതായി അറിയാമോ? എന്നീ കാര്യങ്ങള്‍ക്കാണ് വിശദീകരണം തേടിയത്.
അദാനിക്കെതിരായ എല്ലാ കുറ്റങ്ങളും തള്ളണമെന്ന യുണൈറ്റഡ് സ്റ്റേറ്റ്‌സ് ഡിപ്പാര്‍ട്ട്‌മെന്റ് ഓഫ് ജസ്റ്റിസ് മുന്നോട്ടുവച്ച ആവശ്യത്തിന് , അമേരിക്കയില്‍ നിക്ഷേപിക്കാമെന്ന അദാനിയുടെ വാഗ്ദാനവുമായി ബന്ധമുണ്ടെന്ന റിപ്പോര്‍ട്ടുകള്‍ പ്രിന്‍സിപ്പല്‍ അസോസിയേറ്റ് ഡെപ്യൂട്ടി അറ്റോര്‍ണി ജനറല്‍ ആര്‍ ട്രെന്റ് മക്കോട്ടര്‍ തള്ളി.
