അഹമ്മദാബാദ് : ഇന്ത്യയുടെ വളര്ച്ചയില് ഇത്രയധികം അസൂയയുള്ള ഒരു രാഷ്ട്രീയപ്പാര്ട്ടി കോണ്ഗ്രസിനെപ്പോലെ വേറെയില്ലെന്ന് വീണ്ടും കെനിയയിലെ വിമാനത്താവളപദ്ധതി തെളിയിച്ചിരിക്കുന്നു. അദാനി ഗ്രൂപ്പ് 200 കോടി ഡോളറിന് കെനിയയിലെ ജോമോ കെനിയാത്ത വിമാനത്താവളം പണിയാമെന്ന് സമ്മതിച്ചതാണ്. പക്ഷെ അതിനെതിരെ കെനിയയിലെ കെനിയന് എവിയേഷന് വര്ക്കേഴ്സ് എന്ന ട്രേഡ് യൂണിയനെക്കൊണ്ട് സമരം ചെയ്യിച്ചത് ചൈനയാണ്.
ഈ സമരം മറ്റ് വിമാനത്താവളത്തിലേക്ക് കൂടി പടര്ത്തുമെന്നായപ്പോള് കെനിയന് പ്രസിഡന്റ് വില്യം റൂട്ടോ അദാനിയെ ഈ പദ്ധതിയില് നിന്നും ഒഴിവാക്കി. ഇതോടെ കോണ്ഗ്രസ് വക്താവ് ജയറാം രമേശ് രംഗത്തെത്തി പറഞ്ഞതെന്തെന്നോ? അദാനിയ്ക്ക് പദ്ധതി നല്കാതിരുന്നതിന് കാരണമായി ജയറാം രമേശ് ചൂണ്ടിക്കാണിച്ചത് ഇന്ത്യയുടെ മോശപ്പെട്ട വിദേശനയത്തെയും മോദി സര്ക്കാരിന്റെ അദാനി പ്രീണനത്തെയുമാണ്. ഒരു രാജ്യത്തെ കോര്പറേറ്റ് കമ്പനി വിദേശത്ത് ഒരു പദ്ധതി ഏറ്റെടുക്കുന്നതിന് സഹായിക്കേണ്ടുന്നതിന് പകരം ആ പദ്ധതിയില് നിന്നും ഇന്ത്യന് കമ്പനി ഒഴിവായതിന് മോദി സര്ക്കാരിന്റെ വിദേശനയത്തെ കുറ്റപ്പെടുത്തുകയായിരുന്നു കോണ്ഗ്രസ്.
പക്ഷെ ഇപ്പോള് കേള്ക്കുന്ന വാര്ത്ത ഞെട്ടിപ്പിക്കുന്നതാണ്. ഈ ജോമോ കെനിയാത്ത വിമാനത്താവളം അദാനി 200 കോടി ഡോളറിന് പണിയാമെന്ന് സമ്മതിച്ചതാണ്. പക്ഷെ ഇപ്പോള് ചൈനീസ് കമ്മ്യൂണിക്കേഷന്സ് കണ്സ്ട്രക്ഷന് എന്ന കമ്പനി ഈ പദ്ധതി നിര്മ്മിക്കാന് പോകുന്നത് എത്ര തുകയ്ക്കാണെന്നോ? 290 കോടി ഡോളറിന്. അതായത് അദാനി പറഞ്ഞുറപ്പിച്ച തുകയേക്കാള് ഏകദേശം 50 ശതമാനത്തോളം അധികതുകയ്ക്ക്.
ഇപ്പോള് ഈ പദ്ധതിയുടെ 70 ശതമാനം തുക ചൈനീസ് കമ്പനിക്ക് അഡ്വാന്സായി നല്കുന്നതിനായി കടമെടുക്കാനുള്ള ശ്രമത്തിലാണ് കെനിയന് സര്ക്കാര്. അദാനിയെ ഒഴിവാക്കിയതില് കോണ്ഗ്രസിനും ജയറാം രമേശിനും തൃപ്തിയായിക്കാണും. പകരം ചൈനീസ് കമ്പനിക്ക് അദാനിയേക്കാള് 50 ശതമാനം അധികതുകയ്ക്ക് ഈ പദ്ധതി നല്കപ്പെട്ടതിന്റെ കമ്മീഷന് കോണ്ഗ്രസിന് വഴിയേ വരുമായിരിക്കും.
