തിരുവനന്തപുരം: എറണാകുളത്ത് നടന്ന ഹിന്ദു നേത്യസമ്മേളനം ചര്ച്ച ചെയ്ത വിഷയങ്ങള് അടിയന്തര പ്രാധാന്യത്തോടെ നടപ്പിലാക്കണമെന്ന് ആവശ്യപ്പെട്ട് ഹിന്ദു ഐക്യവദിയുടെ നേതൃത്വത്തില് മുഖ്യമന്ത്രിക്ക് നിവേദനം നല്കി.
ജസ്റ്റിസ് ജെ. ബി. കോശി കമ്മിഷന് മാതൃകയില് സര്ക്കാര് ഒരു കമ്മിഷനെ നിയമിക്കുക, പട്ടികവര്ഗക്കാര് മതം മാറിയാല് അവര്ക്ക് സംവരണ ആനുകൂല്യം നല്കുന്നത് സുപ്രീം കോടതി വിധിയുടെ പശ്ചാത്തലത്തില് അവസാനിപ്പിക്കുക, മതാടിസ്ഥാനത്തില് നല്കുന്ന സംവരണം നിര്ത്തലാക്കുക, ശബരിമല യുവതി പ്രവേശനവുമായി ബന്ധപ്പെട്ട പ്രക്ഷോഭത്തിലെ കേസുകള് പിന്വലിക്കുക, ഗുരുവായൂര് പാര്ത്ഥസാരഥി അടക്കമുള്ള ക്ഷേത്രങ്ങള് ഭക്തര്ക്ക് തിരികെ നല്കുക തുടങ്ങിയവ നിവേദനത്തില് ആവശ്യപ്പെട്ടിട്ടുണ്ട്.
ഹിന്ദു ഐക്യവേദി സംസ്ഥാന അദ്ധ്യക്ഷന് ആര്.വി. ബാബു, മുഖ്യ രക്ഷാധികാരി കെ.പി. ശശികല, ഓള് ഇന്ത്യ ബ്രാഹ്മണ ഫെഡറേഷന് ഉപാദ്ധ്യക്ഷന് സുബ്രഹ്മണ്യന് മൂസ്സത്, മണ്ണാന്സഭ മുന് ജനറല് സെക്രട്ടറി പ്രൊഫ. പി.കെ. ഗോപിനാഥന്, ആദിവാസി മഹാസഭ സംസ്ഥാന അധ്യക്ഷന് മോഹന് ത്രിവേണി, സാമൂഹ്യനീതി കര്മ്മ സമിതി ചെയര്മാന് കെ.വി. ശിവന് തുടങ്ങിയവര് നിവേദക സംഘത്തിലുണ്ടായിരുന്നു.
