തിരുവനന്തപുരം: കെഎസ്ആർടിസിയിൽ എംപാനൽ ജീവനക്കാരുടെ ശമ്പളം മുടങ്ങിയതായി പരാതി. സാധാരണയായി രണ്ടു ഘട്ടങ്ങളായാണ് ശമ്പളം നൽകി വരുന്നത്. ആദ്യത്തെ 15 ദിവസത്തെ ശമ്പളം ആ മാസം 20-നും, ബാക്കി 15 ദിവസത്തെ ശമ്പളം അടുത്ത മാസം പത്തിനകവും നൽകുന്നതാണ് രീതി. എന്നാൽ കഴിഞ്ഞ മാസത്തെ 15 മുതൽ 30 വരെയുള്ള ദിവസങ്ങളിലെ ശമ്പളത്തിന്റെ പകുതി മാത്രമാണ് ഈ മാസം വിതരണം ചെയ്തിരിക്കുന്നത്. ഇത്തരത്തിൽ വെറും 7 ദിവസത്തെ ശമ്പളം മാത്രം ലഭിച്ചതോടെ തങ്ങൾ കടുത്ത സാമ്പത്തിക പ്രതിസന്ധിയിലായെന്ന് ജീവനക്കാർ വ്യക്തമാക്കുന്നു.
ഡ്രൈവർമാരും കണ്ടക്ടർമാരും അടക്കം കെഎസ്ആർടിസിയിൽ നിലവിൽ മൂവായിരത്തോളം ബദൽ ജീവനക്കാരാണ് ജോലി ചെയ്യുന്നത്. പ്രിയദർശിനി സൗജന്യയാത്ര പദ്ധതി മൂലമുണ്ടായ സാമ്പത്തിക പ്രതിസന്ധിയാണോ ശമ്പളം മുടങ്ങാൻ കാരണമായതെന്നാണ് ജീവനക്കാരുടെ സംശയം. എന്നാൽ, അടുത്തയാഴ്ച തന്നെ ബാക്കി തുക നൽകുമെന്നും പ്രിയദർശിനി പദ്ധതിയുമായി നിലവിലെ ശമ്പള പ്രതിസന്ധിക്ക് യാതൊരു ബന്ധവുമില്ലെന്നും കെഎസ്ആർടിസി എംഡി അറിയിച്ചു.
