ബെയ്ജിംഗ്: ഫുജിയാൻ പ്രവിശ്യയിലെ ജിൻജിയാങ് നഗരത്തിലുള്ള ഹുയിറ്റെങ് ഷൂസ് ഫാക്ടറിയിലുണ്ടായ തീപിടിത്തത്തിൽ 28 പേർ ദാരുണമായി മരിച്ചു. അപകടത്തിൽ വലിയ നാശനഷ്ടങ്ങൾ ഉണ്ടായതായി പ്രസിഡന്റ് ഷി ജിൻപിങ് സ്ഥിരീകരിച്ചു. തീപിടിത്തം ഉണ്ടായ സമയത്ത് ഫാക്ടറിയിൽ ഏകദേശം 240 ഓളം തൊഴിലാളികൾ ഉണ്ടായിരുന്നു. ഫാക്ടറിയുടെ താഴത്തെ നിലയിൽ സൂക്ഷിച്ചിരുന്ന എളുപ്പത്തിൽ തീപിടിക്കുന്ന ഷൂ നിർമ്മാണ വസ്തുക്കളും പശകളും അഗ്നിബാധയുടെ തീവ്രത വർധിപ്പിക്കുകയും പെട്ടെന്ന് തന്നെ തീ പടരുകയും ചെയ്തു.
അപകടവിവരമറിഞ്ഞ ഉടൻ തന്നെ തീ അണയ്‌ക്കാനും കുടുങ്ങിക്കിടക്കുന്നവരെ രക്ഷപ്പെടുത്താനുമായി 500ലധികം പേരെ അധികൃതർ സംഭവസ്ഥലത്തേക്ക് അയച്ചു. രക്ഷാപ്രവർത്തനം വേഗത്തിലാക്കാനും പരിക്കേറ്റവർക്ക് അടിയന്തര ചികിത്സ ഉറപ്പാക്കാനും സംഭവത്തിൽ കൃത്യമായ അന്വേഷണം നടത്താനും പ്രസിഡന്റ് ഷി ജിൻപിങ് കർശന നിർദേശം നൽകി.
